چاودێری خواردنگه‌ی خوێندنگاكان ده‌كرێت

هاوشێوه‌ی خواردنگه‌و رێستۆرانته‌كان لێپرسینه‌وه‌یان له‌گه‌ڵدا ده‌كرێت

لیژنه‌ هاوبه‌شه‌كانی قائیمقامیه‌تی سلێمانی چاودێری وردی خواردنگه‌ی خوێندنگاكانی شاری سلێمانی ده‌كه‌ن، بۆ ئه‌وه‌ی ئه‌و خواردن و خواردنه‌وانه‌ی له‌ خوێندنگاكاندا پێشكه‌ش به‌ خوێندكاران ده‌كرێت له‌ڕووی ته‌ندروستییه‌وه‌ گونجاو و ته‌ندروست بێت.

ئه‌مڕۆ 20-10-2014 له‌ پێناو پاراستنی ته‌ندروستی خوێندكاران و رێگریكردن له‌ خواردنی نه‌گونجاو و به‌رزبوونه‌وه‌ی نرخ، لیژنه‌ هاوبه‌شه‌كانی قائیمقامیه‌تی سلێمانی هه‌ڵمه‌تێكی فراوانیان بۆ به‌سه‌ركردنه‌وه‌ی خوێندنگاكانی ناو شاری سلێمانی ده‌ستپێكرد، بۆ ئاگاداربوون له‌ چۆنییه‌تی كاركردنی خواردنگه‌ی خوێندنگاكان له‌ڕووی پاكوخاوێنی و لایه‌نی ته‌ندروستی و نرخه‌وه‌.

هه‌ر له‌و به‌سه‌ركردنه‌وه‌یه‌دا لیژنه‌كان رێنمایی پێویستیان دایه‌ ئه‌و كه‌سانه‌ی كه‌ له‌ خواردنگه‌كاندا كارده‌كه‌ن و داوایان لێكردن له‌ پێناو پاراستنی ته‌ندروستی خوێندكاراندا پابه‌ندبن به‌ سه‌رجه‌م مه‌رج و رێنماییه‌كانه‌وه‌.

له‌وباره‌یه‌وه‌ هاوڕێ محه‌مه‌د ئه‌ندامی لیژنه‌ هاوبه‌شه‌كانی قائیمقامیه‌تی سلێمانی رایگه‌یاند: له‌گه‌ڵ كردنه‌وه‌ی خوێندنگاكاندا به‌پێویستیانزانی بۆ پاراستنی ته‌ندروستی خوێندكاران خوێندنگاكان به‌سه‌ربكه‌نه‌وه‌و له‌نزیكه‌وه‌ له‌ چۆنییه‌تی ئاماده‌كردنی ئه‌و خواردن و خواردنه‌وانه‌ بكۆڵنه‌وه‌ كه‌ پێشكه‌شی خوێندكاران ده‌كرێت، ئاماژه‌ی بۆ ئه‌وه‌شكرد كه‌ ئه‌م هه‌ڵمه‌ته‌یان بۆ پێدانی زانیاری پێویست بووه‌ به‌و كه‌سانه‌ی كه‌ له‌ خواردنگه‌ی خوێندنگاكاندا كارده‌كه‌ن بۆ ئه‌وه‌ی پابه‌ندبن به‌ مه‌رج و رێنماییه‌كانه‌وه‌و خواردنی نه‌گونجاو و زیانبه‌خش نه‌ده‌ن به‌ خوێندكاران.

هاوڕێ محه‌مه‌د راشیگه‌یاند: سه‌رباری چاودێریكردنی خواردنگه‌ی خوێندنگاكان چاودێری تانكی و سیستمی ئاوخواردنه‌وه‌ی هه‌موو خوێندنگاكان ده‌كه‌ن، بۆ ئه‌وه‌ی ئه‌و ئاوه‌ی بۆ خوێندكاران دابینده‌كرێت له‌ڕووی ته‌ندروستییه‌وه‌ گونجاو بێت، وتیشی: له‌سه‌ر فه‌رمانی قائیمقامی سلێمانی گه‌ڕان و به‌سه‌ركردنه‌وه‌كانیان به‌رده‌وامده‌بێت و رێنمایی پێویست ده‌درێته‌ ئه‌و كه‌سانه‌ی كه‌ له‌ خواردنگه‌ی خوێندنگاكاندا كارده‌كه‌ن و له‌ ئه‌گه‌ری پابه‌ندنه‌بوونیشیاندا، هاوشێوه‌ی خواردنگه‌و رێستۆرانته‌كان لێپرسینه‌وه‌یان له‌گه‌ڵدا ده‌كرێت.

PUKmedia