یه‌كێتی داهێنه‌ری ئازادی و قبوڵكردنی به‌رامبه‌ره‌

یه‌كێتی خۆری ئازادی و ئاشتی و پێكه‌وه‌ ژیان

وته‌بێژی یه‌كێتیی نیشتمانیی كوردستان بۆ هه‌ڵبژاردنه‌كان رایده‌گه‌یه‌نێت: دڕاندن و شێواندنی پۆسته‌ری هه‌ڵبژاردنه‌كان، هه‌وڵێكی لاوازو تێگه‌شتنێكی زۆر به‌رته‌سك و كێشه‌یه‌كی ده‌رونیه‌ و هه‌وڵی شێواندنی به‌رامبه‌ره‌ له‌ ناخێكی شێواوه‌ ده‌رده‌چێت.

سه‌باره‌ت به‌ دڕاندن و ناشرینكردن و شێواندنی پۆسته‌ری كاندیده‌كانی هه‌ڵبژاردن،له‌وباره‌یه‌وه‌ د.جوان ئیحسان وته‌بێژی یه‌كێتیی نیشتمانیی كوردستان بۆ هه‌ڵبژاردنه‌كان له‌ لێدوانێكدا به‌ PUKmedia ی راگه‌یاند: ده‌بینین كه‌له‌سه‌ر جاده‌و شوێنه‌ گشتییه‌كاندا پۆسته‌ری كاندیده‌كانی یه‌كێتی و زۆرێك له‌ لایه‌نه‌كانی تریش ئه‌دڕێندرێن و ده‌ستكاری ئه‌كرێن و ئه‌شێوێنرێن له‌ناو شاری سلێمانی و له‌قه‌زاو ناحییه‌كان و شاره‌كانی تر ئه‌م دیارده‌یه‌ زۆر به‌رچاوه‌ ئه‌م بارودۆخه‌ له‌زۆربه‌ی زۆری ناوچه‌كانی عیراقیشدا له‌م هه‌ڵبژاردنه‌و هه‌ڵبژاردنه‌كانی تریش هه‌بووه‌و دووباره‌ش ده‌بێته‌وه‌ ته‌نانه‌ت له‌سه‌ر ئاستی جیهانیش رووده‌دات.

روودانی ئه‌مكارانه‌ش ده‌كه‌وێته‌ سه‌ر ئاستی رۆشنبیری و هه‌ڵسوكه‌وتی هاووڵاتیان له‌میانه‌ی ئه‌و هه‌ڵمه‌ته‌دا، ئێمه‌ وه‌ك یه‌كێتیی نیشتمانیی كوردستان ئیدانه‌ی ئه‌و كارانه‌ ده‌كه‌ین و به‌كارێكی خراپ و ناشارستانی ده‌زانین، ئه‌و كارانه‌ گوزارشت له‌ بێده‌سه‌ڵاتی ده‌كات و ئه‌و كاره‌ نه‌شیاوانه‌ هیچ كاریگه‌ری نابێت له‌سه‌ر ئه‌و كاندیده‌ی وێنه‌كه‌ی ده‌شێوێندرێت.

هه‌وه‌ها وتی:  ئێمه‌ وه‌ك یه‌كێتی نیشتمانیی كوردستان، په‌یاممان بۆ هه‌واداران و لایه‌نگرانمان و خۆشه‌ویستانی یه‌كێتیی نیشتمانیی كوردستان سه‌باره‌ت به‌وپۆسته‌رانه‌ی كه‌ هی لایه‌نه‌ سیاسیه‌كانی تره‌ به‌ چاوێكی رێزه‌وه‌ سه‌یریان بكه‌ن و نه‌كه‌ونه‌ ژێر كاریگه‌ری ئه‌وه‌ی چی به‌پۆسته‌ره‌كانی كاندیده‌كانی یه‌كێتی ده‌كرێن، و مه‌كه‌ونه‌ ژێر ئه‌و فشاره‌وه‌ ئه‌مه‌ شتێكی تێكده‌رانه‌یه‌و ده‌ستێكی ئاژاوه‌گێریانه‌یه‌ له‌وپه‌ری بێده‌سه‌ڵاتی زیاتر گوزارشت له‌ هیچی تر ناكات، و له‌لایه‌كی تره‌وه‌ ئه‌و په‌یامه‌مان هه‌یه‌ هیچ كاردانه‌وه‌یه‌كیان نه‌بێت به‌رامبه‌ر هیچ پۆسته‌رێك یان هیچ ره‌مزێك كه‌په‌یوه‌ندی به‌لایه‌نه‌ سیاسیه‌كانی تره‌وه‌ هه‌بێت و هه‌وڵبده‌ن ئه‌و ماوه‌یه‌یی كه‌ ماوه‌ بۆ هه‌ڵمه‌تی هه‌ڵبژاردن به‌ هێمنی و ئارامی به‌ڕێوه‌بچێت كه‌ لایه‌ق بێت به‌ناو و ناوبانگی یه‌كێتیی نیشتمانیی كوردستان.

د.جوان ئیحسان وتیشی: ئه‌وه‌ هه‌وڵێكی لاوازو تێگه‌شتنێكی زۆر به‌رته‌سك و كێشه‌یه‌كی ده‌رونیشه‌، ئه‌وكه‌س و ده‌ستانه‌ی ئه‌وكارانه‌ ده‌كه‌ن، هه‌روه‌ها ئه‌و هه‌وڵی شێواندنی به‌رامبه‌ره‌ له‌ ناخێكی شێواوه‌ ده‌رده‌چێت.

PUKmedia