ئاری هه‌رسین داوای هه‌ڵوێست له‌پارتی ده‌كات

.

ئاری هه‌رسین په‌رله‌مانتاری خولی پێشووی په‌رله‌مانی كوردستان له‌فراكسیۆنی پارتی دیموكراتی كوردستان، له‌وتارێكدا كه‌ تایبه‌ت بۆ PUKmedia ی ناردوه‌، به‌توندی دژی ئه‌وانه‌ وه‌ستاوه‌ته‌وه‌ كه‌ له‌ژێر سێبه‌ری پارتیدا سوكایه‌تی به‌سلێمانی ده‌كه‌ن و به‌ ده‌مڕوت و نه‌زان و كاسه‌لێس و ناڕه‌سه‌ن وه‌سفیان ده‌كات.

هه‌رسین له‌نوسینه‌كه‌یدا ئاماژه‌ی بۆ ئه‌وه‌ كردووه‌ كه‌ "ده‌مڕوت و نه‌زان و كاسه‌لێس و ناڕه‌سه‌نی وا په‌یدا بوون كه‌ له‌ ژێر سێبه‌ری پارتی بوندا، و له‌ خوار جه‌مه‌دانه‌ی سوره‌وه‌، سوكایه‌تی به‌ سلێمانی گه‌وره‌ ئه‌كه‌ن (كه‌ له‌ ئه‌ساسدا هیچ نه‌بوون جگه‌ له‌ په‌یامنێرێكی ده‌ره‌جه‌ هیچ)".

ئاری محه‌مه‌د هه‌رسین داوای هه‌ڵوێستوه‌رگرتنیشی له‌پارتی دیموكراتی كوردستان كردوه‌و ده‌ڵێت:  هیوادارم نمایه‌نده‌كانی جه‌مه‌دانه‌ی سوور و، مه‌كته‌بی سیاسی پارتی دیموكراتی كوردستان هه‌ڵوێستیان ڕوون بێت.

ده‌شڵێت، له‌ بێده‌نگی ئه‌م لایه‌نه‌ په‌یوه‌ندیدارانه‌دا، به‌نده‌ ته‌رجومه‌ی په‌نده‌ فارسیه‌كه‌ی بۆ ئه‌كه‌م كه‌ ئه‌ڵێت: (سكوت نشانه‌ رزا است).

له‌كۆتاییشدا نوسیویه‌تی، ئه‌م پاڵه‌وانانه‌ی كه‌ له‌پاڵ سه‌نگه‌ری پارتیدا زاتی ئه‌وه‌ ئه‌كه‌ن په‌نجه‌ بۆ نه‌مامی گوڵه‌كانی شه‌هیدانی گردی سه‌یوان به‌رن، با وه‌ك ئێمه‌ چۆن له‌ هه‌ولێر و دهۆك هه‌ین، بفه‌رمون پیاسه‌یه‌كی به‌رده‌ركی سه‌را و تووی مه‌لیك بكه‌ن و له‌وێ جورئه‌تیان هه‌بێت چاو ببڕنه‌ چاومان و پێمان بڵێن ئێمه‌ موشاغه‌به‌چین… ئه‌گینا با بۆ هه‌میشه‌ ئوسكوت بن.

PUKmedia  تایبه‌ت