وەزیری نەوت داوا دەکات پەرلەمان میوانداریی بکات بۆ روونکردنەوەی پلانەکانی

راگەیاندنی وەزارەت

باسم محەممەد خزەیر وەزیرى نەوتى عیراق

وەزیری نەوتی عیراق، داوا دەکات ئەنجومەنی نوێنەران میوانداری بکات، بۆ ئەوەی پلانەکانی وەزارەتەکەی لە دۆسییە جیاوازەکانی نەوت و وزە بۆ پەرلەمانتاران و هاووڵاتیان روون بکاتەوە.

باسم محەممەد خزەیر وەزیرى نەوتى عیراق، نوسراوێکی رەسمی ئاڕاستەی ئەنجومەنی نوێنەران کردووە و تیایدا داوای میوانداری کردووە و ئامادەیی دەربڕیوە وەڵامى سەرجەم ئەندامانى ئەنجوومەنى نوێنەران بداتەوە لەهەر بابەتێکى پەیوەست بە دۆسییەى نەوت و غاز.

بەپێی راگەیەندراوێکی وەزارەتی نەوت، ئەم هەنگاوە نیشانەى شەفافیەت و هەماهەنگییە لەنێوان دامەزراوەکان و ئەو پرسیارانەى هاووڵاتییان لەسەر کارى دامەزراوە حکومییەکان هەیانە.

ئەمەش لەکاتێکدایە، عیراق ئێستا بەهۆی گرژییەکانی ناوچەکەوە، رووبەڕووی قەیرانی هەناردەی نەوت بووەتەوە، ئەمە جگە لەوەی داهاتی نەوت کەمیکردووە و  قەیرانى دابینکردنى سووتەمەنى و گرانبوونى نرخەکەى لە عیراق و هەرێمى کوردستان سەریهەڵداوە.

PUKMEDIA