سێ گوندیان لە کوردستانن...عیراق پێنج گوند بۆ باشترین گوندە گەشتیارییەکانی جیهان کاندید دەکات

PUKMEDIA

ناوچەی بیارە لە پارێزگای هەڵەبجە

دەستەی گەشتوگوزاری عیراق، پێنج گوند بۆ باشترین گوندە گەشتیارییەکانی جیهان کاندید دەکات، کە سێ گوندیان دەکەونە هەرێمی کوردستانەوە، ئامانجی پڕۆژەکەش بۆ گەشەپێدانی بەردەوامی گەشتوگوزاری عیراقە.

عەلی یاسین عەبدولڕەزا، وتەبێژی دەستەی گشتیی گەشتوگوزاری عیراق، رایگەیاند: پڕۆسەی کاندیدکردنی پێنج گوند لە چوارچێوەی دەستپێشخەریی (باشترین گوندە گەشتیارییەکانی 2026)ی سەر بە ڕێکخراوی گەشتوگوزاری جیهانیی نەتەوە یەکگرتووەکان تەواو کراوە.

لە بارەی ئەو گوندانەشی کاندید کراون، رایگەیاند: بیارە لە پارێزگای هەڵەبجە، رەواندز لە هەولێر، هرور لە دهۆک، مێرکی لە نەینەوا، ئەبو سوبات لە زیقار، ئەو پێنج ناوچەیەن کە کاندیدن.

وتەبێژی دەستەی گشتیی گەشتوگوزاری عیراق ڕوونیکردەوە: ئەم کاندید کردنە لە چوارچێوەی دەستپێشخەریی ڕێکخراوی گەشتوگوزاری نەتەوە یەکگرتووەکاندایە بۆ دەستنیشانکردنی 100 باشترین گوندی گەشتیاری لەسەر ئاستی جیهان، بۆ ئەم مەبەستەش، دەستەکە تیمی تەکنیکی لەسەر بەرزترین ئاستی پسپۆڕی پێکهێناوە و سەردانی گوندەکانی عیراقیان کردووە، دوای تاوتوێکردنی پێوەرەکانیش،دۆسیەی گشتگیر و هەمەلایەن بۆ ئەو پێنج گوندە ئامادە کراون.

 لە کۆتایشدا، عەلی یاسین عەبدولڕەزا، وتەبێژی دەستەی گشتیی گەشتوگوزاری عیراق، دووپاتی کردەوە: ئامانجی ئەم هەنگاوە، بۆ گەشەپێدانی بەردەوامی گەشتوگوزاری عیراقە.

PUKMEDIA