لێدوانەکانی ترەمپ نرخی نەوتی دابەزاندو گرێبەستی پشکەکانی بەرزکردەوە

ئاژانسەکان

گرێبەستی پشکەکان لە بازاڕی ئەمریکا بەرزبوەوە

لێدوانەکانی سەرۆکی ئەمریکا بۆ دواخستنی هێرشەكان  بۆسەر وێستگەكانی كارەبا و ژێرخانی وزەی ئێران، نرخی نەوتی دابەزاند و گرێبەستی پشکەکانیشی لە بازاڕی ئەمریکادا بەشێوەیەکی کتوپڕ و بەرچاو بەرزکردەوە.

بەیانی ئەمڕۆ بازاڕە داراییەکانی ئەمریکا بەرزبوونەوەیەکی کتوپڕ و بەرچاویان لە گرێبەستی پشکەکاندا بەخۆوە بینی، ئەمەش دوای ئەوە هات کە دۆناڵد ترەمپ، سەرۆکی ئەمریکا، رایگەیاند: واشنتۆن و تاران لە دوو رۆژی رابردوودا گفتوگۆیەکی "باش و بەرهەمداریان" ئەنجامداوە.

ترەمپ لە لێدوانەکەیدا لە لە تۆڕی کۆمەڵایەتی تروس سۆشیاڵ ئاماژەی بەوەش کردووە کە بڕیاری داوە هێرشکردنە سەر وێستگەکانی وزە و ژێرخانی وزەی ئێران رابگرێت.

بەهۆی ئەو لێدوانەی ترەمپەوە پشکەکانی داو جۆنز بەڕێژەی هەزار و 100 خاڵ بەرزبوونەوە  کە رێژەی %2.6 دەکات و پشەکەکانی  S&P 500 و Nasdaq-100  بە ڕێژەی %2.7 بەرزبوونەوەیان بەخۆوە بینی.

لە بەرامبەردا، بەپێی راپۆرتێکی تۆڕی "CNBC"ی ئەمریکی نرخی نەوتی خاو دوای لێدوانەکەی ترەمپ بە توندی دابەزی و نەوتی تەکساس زیاتر لە %9 دابەزی و نرخی هەر بەرمیلێک گەیشتە کەمتر لە 90 دۆلار و نرخی نەوتی پرێنت زیاتر لە %13 دابەزی و نرخەکەی بۆ کەمتر لە 97 دۆلار بۆ هەر بەرمیلێک دابەزی.

PUKMEDIA