لە سلێمانی دابەشکردنی غاز ئاسایی دەبێتەوە

PUKMEDIA

دابەشکردنی غاز

قائیمقامیەتی سلێمانی ڕایگەیاند، قەیرانی کەمی غاز کۆتایی هاتووە و لە ئەمڕۆوە دابەشکردنی غاز لە سلێمانی ئاسایی بووەتەوە و تەنیا ئەمڕۆ 235 بارهەڵگری پڕ لە بتڵە غاز براونەتە گەڕەکەکان و بەسەر هاووڵاتیاندا دابەشدەکرێن.

عومەر عەبدوڵڵا، سەپەرشتیاری دابەشکردنی غاز لە قایمقامیەتی سلێمانی بە کەناڵ8ـی وت، ئەمڕۆ 70٪ دابەشکردنی غاز وەک پێشووتر ئاسایی بووەتەوە و سبەی دەبێتە 90٪ ئەوەش بەهۆی ئەوەی تەواوی 15 کارگە دەکەونەوە کار هاوشێوەی پێشوو.

سەپەرشتیاری دابەشکردنی غاز لە قایمقامیەتی سلێمانی ئاماژەی بەوەشکرد، لەماوەی ڕۆژانی ڕابردوو و لەکاتی دروستبوونی قەیرانی غازی ماڵان، ئەو بریکارانەی غازیان گرانفرۆش کردووە 185 بریکار پسوڵەی سەرپێچی بۆ دەرکراوە.

لەلایەکی دیکەوە، ئازاد ڕەمەزان نوێنەری نانەواخانە و سەمونخانەکان لە سەندیکای کرێکاران باسی لەوەکرد، ئەمڕۆ23ی3ی2026، ژمارەیەکی باش بتڵە غاز بەسەر نانەواخانەکان دابەشکراوە و گرفتی نانەواخانەکان چارەسەرکراوە، ئاماژەی بەوەشکرد لە ماوەی ڕۆژانی پێشوو بەهۆی گرانبوونی غازەوە بارگرانی کەوتبووەسەر شانی نانەواخانەکان و ئەگەر دۆخەکە چارەسەر نەکرایە، ناچاردەبوون نرخی سەموون و نان گرانبەن.

PUKMEDIA