باڵیۆزی وڵاتان ئیدانەی هێرشەکانی سەر هەرێمی کوردستان دەکەن

واع

کۆبوونەوە لەگەڵ باڵیۆزی وڵاتانی یەکێتی ئەوروپا

باڵیۆز و نێردە دیپلۆماسییەکان لە عیراق ئیدانەی هێرشەکانی سەر هەرێمی کوردستان دەکەن و راوێژکاری ئەنجومەنی ئاسایشی نەتەوەیی عیراقیش رایدەگەیەنێت: عیراق لەم جەنگەدا بێ لایەنە و پاڵپشتی کاری ئاسایی دیپلۆماتکارانیش دەکات.

 ئەمڕۆ 15ی3ی2026، قاسم ئەعرەجی راوێژکاری ئەنجومەنی ئاسایشی نەتەوەیی عیراق، لەگەڵ باڵیۆز و نێردە دیپلۆماسییەکانی وڵاتانی یەکێتی ئەوروپا لە عیراق کۆبووەوە و تیایدا باسی لە هەڵوێستی عیراق کرد، کە لەم جەنگەی کە ئێستا رۆژهەڵاتی ناوەڕاستی گرتووەتەوە، بێ لایەنە.

راوێژکاری ئەنجومەنی ئاسایشی نەتەوەیی عیراق، دووپاتیشی کردووەتەوە، عیراق هەر هێرشێک بۆ سەر نێردە دیپلۆماسییەکان و باڵیۆزخانەکان رەتدەکاتەوە، هەروەها بەدوای هەموو ئەو لایەنانەدا دەگەڕێت کە لەو کردەوانە تێوەگلاون و لێپێچینەوەی توندیان لەگەڵ دەکات.

راشیگەیاند: گرنگە نێردە دیپلۆماسییەکان بەشێوەی ئاسایی کاری خۆیان جێبەجێ بکەن و هێزە سیاسییەکانی عیراقیش بەردەوامن لەسەر تەواو کردنی رێرەوی  دیموکراسی.
 هەر لە کۆبوونەوەکەدا، باڵیۆزانی وڵاتانی یەکێتی ئەوروپا بە توندی هێرشەکانی سەر هەرێمی کوردستان و ناوخۆی عیراقیان ئیدانە کرد و هیواشیان خواست عیراق نەخزێنرێتە ناو جەنگەکەوە.

PUKMEDIA