وەزیری رۆشنبیری: یەکدەنگی خەڵکی کوردستان ئاماژەی سەردەمێکی نوێی گیانی کوردایەتییە

پەرەی وەزیری رۆشنبیری

حەمەی حەمەسەعید وەزیری ڕۆشنبیری و لاوانی هەرێمی کوردستان

حەمەی حەمەسەعید وەزیری ڕۆشنبیری و لاوانی هەرێمی کوردستان، لە پەیامێکیدا سوپاس و پێزانینی خۆی بۆ کەناڵەکانی ڕاگەیاندن و کۆمەڵانی خەڵکی کوردستان دەردەبڕێت و دووپاتیشی دەکاتەوە، یەکدەنگی و بەتەنگەوەبوونی کۆمەڵگەی کوردستانی و وەستانیان شانبەشانی خوشک و برایانمان لە ڕۆژئاڤای کوردستان، نیشانەی دەرکەوتنی سەردەمێکی نوێی گیانی کوردایەتییە.

وەزیری رۆشنبیری لە پەیامەکەیدا رایگەیاندووە:بە ناوی خۆمان و وەزارەتی ڕۆشنبیری و لاوانی حکومەتی هەرێمی کوردستانەوە، سوپاس و پێزانین بۆ کۆدەنگی و هەماهەنگی کەناڵەکانی ڕاگەیاندن(نووسراو، بینراو، بیستراو، ئەلیکترۆنی)، نووسەران، ڕۆشنبیران، هونەرمەندان، وەرزشوانان، لاوان و چالاکانی تۆڕە کۆمەڵایەتییەکان دەردەبڕین لە پای بەتەنگەوە بوونی دۆزی کورد لە ڕۆژئاڤای کوردستان و گەیاندنی دەنگی گەلی کورد بە جیهان و ڕێگریکردن لە جینۆسایدێکی دیکە دژ بە گەلی کورد.

حەمەی حەمەسەعید ئاماژەی بەوەشکردووە:یەکدەنگی و بەتەنگەوەبوونی توێژە جیاجیاکانی کۆمەڵگەی کوردستانی و وەستانیان شانبەشانی خوشک و برایانمان لە ڕۆژئاڤای کوردستان، نیشانەی دەرکەوتنی سەردەمێکی نوێی گیانی کوردایەتی و خەمڵینی خەباتی نەتەوایەتییە لە پێناو ڕزگاری نیشتمانیدا.
دووپاتیشی دەکاتەوە: ئەم یەکدەنگییە نیشتمانییە لە ئاستی جیهاندا بووە گەورەترین بەربەست لە بەردەم میدیای شۆڤێنی و پشتیوانانی تیرۆر و ڕێگر بوو لەبەردەم ئەو ماکینانەی پڕوپاگەندە، کە دژی کورد و بزووتنەوە نەتەوەییەکەی خرابوونەکار و هەوڵی شێواندنی ڕاستییەکان و دروستکردنی زەمینەی جینۆسایدێکی دیکەیان دەدا.

لە کۆتایشدا، حەمەی حەمەسەعید وەزیری ڕۆشنبیری و لاوانی هەرێمی کوردستان، داوا لە هەموو لایەک دەکات بەو گیانە نیشتمانی و نەتەوەییە و لە چوارچێوەی پاراستنی کولتووری ئاشتەوایی و پێکەوەژیانی کۆمەڵگەی کوردستان بەردەوام بن لە گەیاندنی ڕاستییەکان.

PUKMEDIA