قوباد تاڵەبانی: پێویستە هەرێم و بەغدا پێکەوە هاوکار و هەماهەنگ بن

راگەیاندنی جێگری سەرۆکوەزیران

قوباد تاڵەبانی و فەرامەرز ئەسەدی، کونسوڵی گشتیی ئێران لە هەولێر

قوباد تاڵەبانی، جێگری سەرۆکوەزیران پێشوازیکرد لە فەرامەرز ئەسەدی، کونسوڵی گشتیی کۆماری ئیسلامیی ئێران لە هەولێر و لەبارەی چەند پرسێکی جێی بایەخی هەردوولا ئاڵوگۆڕی بێروڕایان کرد.

لە تەوەرێکی کۆبوونەوەکەدا کە رۆژی چوارشەمە(10/6/2026) بەڕێوەچوو، باس لە دواین پێشهاتەکانی ناوچەکە کرا، لەمبارەیەوە جێگری سەرۆکوەزیران هیوای خواست دانووستانەکانی نێوان ئەمریکا و ئێران بە دەرەنجامێکی دڵخواز بۆ هەموو لایەک بگات و ئاشتی و سەقامگیری هەمیشەیی لێ بکەوێتەوە.

سەبارەت بە دۆخی عیراق و پێکهاتنی حکومەتی نوێی عیراق، قوباد تاڵەبانی گەشبینی خۆی دەربڕی بەوەی دەرفەتێکی باش هاتووەتە ئاراوە بۆ چارەسەرکردنی کێشەکانی نێوان هەرێم و بەغدا و جەختیکردەوە لەوەی پێویستە لەم قۆناغەدا هەرێم و بەغدا پێکەوە هاوکار و هەماهەنگ بن و کاربکەن بۆ گەشەپێدانی ئابووری و باشترکردنی دۆخی خزمەتگوزاری و ژیان و گوزەرانی هاووڵاتییان.

لە تەوەرێکی دیکەدا باس لە دۆخی سیاسی ناوخۆی هەرێمی کوردستان کرا. لەمبارەیەشەوە جێگری سەرۆکوەزیران جەختیکردەوە لەسەر زیاترکردنی هەوڵەکان بۆ کۆتاییهێنان بەو چەقبەستووییەی ئێستا هەیە و بە پێویستی زانی دانووستانەکانی نێوان لایەنەکان بۆ پێکهێنانی حکومەتێک لەسەر بنەمای هاوبەشیی راستەقینە دەست پێ بکاتەوە.

PUKMEDIA