فەرماندەی هێزەکانی 70: هەوڵەکان لەپێناو بونیادنانی هێزێکی تۆکمەی یەکگرتووبێت

PUKMEDIA

کۆبونەوەی فەرماندەی هێزەکانی ٧٠ و وەفدێکی باڵیۆزخانەی ئەمریکا

فەرماندەی هێزەکانی 70 لەگەڵ وەفدێکی باڵیۆزخانەی ئەمریکا کۆبوەوەو رایگەیاند: لەم دەرفەتەدا هەوڵەکان هەمووی لەپێناو بونیادنانی هێزێکی تۆکمەی یەکگرتووبێت، هاوکات داوای لە وەفدی میوان كرد پاڵپشت و پشتیوانى هێزى پێشمه‌رگه‌ بن.

راگەیاندنی هێزەکانی ٧٠ لە راگەیەندراوێکدا رایگەیاندوە: ئەمڕۆ، ٥ ـی كانونی دووه‌مى ٢٠٢٦ لیوا رکن "عومەر ساڵح حەسەن" فەرماندەی هێزەکانی ۷۰ بە ئامادەبوونی " پۆڵۆ شاڵاو عەلی عەسکەری  " بەرپرسی هەواڵگری هێزەکانی ۷۰ و "مزەفەر سەعید" بەڕێوەبەری گشتی پەیوەندییەکان و هەماهەنگی هێزەکانی ۷۰ پێشوازی لە عەقید " ستێفانی باگلی "  پاشکۆی سەربازی لە باڵیۆزخانەی ئەمەریکا لە بەغداد و  کۆڵۆنێڵ "دێک پیلوێک " بەرپرسی نووسینگەی هاریکاری ئاسایش لە کونسوڵخانەی ئەمریکا لە هەرێمی کوردستان و رائد "بێنسۆن" فەرماندەی تیمی لیوای هاوکاری هێزە ئەمنیەکانی هاوپەیمانان (SFAB) وەفدی باڵای یاوەری کرد .

لەکۆبوونەوەکەدا دواین پێشهاتەکانی پرسی دروست کردنی فەرماندەیی ناوچە و دەسەڵاتەکانی بەوردی تاوتوێ کران و سەرجەم خاڵ و بڕگەکانی ئەو بەرنامە و پلانانەی کە لە ماوەی رابروودا پەیوەست بەو پرسە گیراونەتە بەر و کاریان پێکراوە خرانه‌ روو.

لای خۆیەوە فەرماندەی هێزەکانی ۷۰ بەوردی تیشکی خستە سەر سەرجەم ئەو خاڵ و رێکار و ئاستەنگانەی کە لەئێستا و رابردووشدا بەربەست بوون لە بەرەوپێشچونی ئەو پرۆسەیە، پەیوەست بەو بابەتەش پێشنیارو تێبینی خۆی و رێگا چارەی گونجاوی سەبارەت بەکۆی پرۆسەکە بۆ وەفدی میوان خستەڕوو، هەروەها ئاماژەی بۆ ئەوەکرد کە فەرماندەیی ناوچە پێویستە بە پلان و بەرنامە و بەتۆکمەی دابمەزرێت و بناغەیەکی بەهێزی هەبێت چونکە ئەم پرۆسەیە وابەستەیە بە ئایندەی هێزی پێشمەرگە و حکومەتی هەرێمی کوردستان ، بۆیە پێویستە لەم دەرفەتەدا هەوڵەکان هەمووی لەپێناو بونیادنانی هێزێکی تۆکمەی یەکگرتووبێت، هاوکات داوای لە وەفدی میوان كرد  پاڵپشت و پشتیوانى هێزى پێشمه‌رگه‌ بن له‌  بەدواداچون و چاره‌سه‌ركردنى ئاستەنگ و بەربەسته‌كان لەپێناو چارەسەرکردنی سەرجەم گرفتەکان و سەرخستنی پرۆسەکە. راشیگه‌یاند هێزەکانی ٧٠ سەرجەم ئامادەکاریەکانی یەکگرتنەوەی هێزی پێشمەرگەی  تەواوی کردوە .

هه‌ر لە درێژه‌ى وته‌كانیدا  لیوا رکن "عومەر ساڵح حەسەن" فەرماندەی هێزەکانی ۷۰ هاوکاری و پاڵپشتیەکانی هێزەکانی ئه‌مریكاى بۆ هێزی پێشمەرگەی کوردستان بەرزنرخاند و ئاماژەی بۆ ئەوەکرد کە هەر لەسەرەتای شەڕی دژ به‌ تیرۆر و تیرۆرستان و شه‌ڕى دژ بەداعش  هێزەکانی ئه‌مریكاى بەردەوام هاوکار و پاڵپشتێکی بەهێزبوون رۆڵی گرنگ و بەرچاویان هەبووە لەسەرجەم قۆناغەکاندا . 

خاڵ و بەندەکانی ناو یاداشت نامەی لێکتێگەشتنی نێوان وەزارەتی پێشمەرگە و وەزارەتی جه‌نگى ئەمریکا ته‌وه‌رێكى ترى كۆبونه‌وه‌كه‌ بوو هه‌ردوو لا جەختیان  کردەوە لەسەر گرنگی جێ بەجێکردنی یاداشت نامەكه‌ .  

له‌ كۆتایى کۆبونەوەکەدا تیشک خرایە سەر ئەو هێرش و په‌لاماره‌ تێکدەرانەیەی کە لەماوەكانى ڕابردوودا کرایە سەری کێڵگەی گازی کۆرمۆر و لێکەوتەکانی له‌سه‌ر ناوچه‌كه‌و هاوڵاتیان و ، لەو بارەیەشەوە هەردوولا جه‌ختیان كرده‌وه‌ له‌ دۆزینه‌وه‌ى رێگا چاره‌یه‌كى گونجاو لەپێناو رێگریکردن لە هێرش و هەوڵی تێکدەرانەی هاوشێوە لە داهاتوودا له‌پێناو پاراستنى هاوڵاتیان و بنه‌بڕكردنى هه‌وڵه‌ تیرۆرستیه‌كان .

PUKMEDIA