عیراق بڕی هەناردەی نەوت زیاد دەکات

میدیاکان

لۆگۆی رێکخراوی ئۆپیک

عیراق لە ساڵی نوێدا بڕی 273 هەزار بەرمیلی رۆژانە لە هەناردەی نەوت زیاد دەکات کە پێشتر بە بڕیاری ئۆپیک راگیرا بوو، بەمەش هەناردەی نەوت بۆ چوار ملیۆن و 273 هەزار بەرمیلی رۆژانە بەرز دەکاتەوە.

محەمەد نەجار نوێنەری عیراق لە رێکخراوی ئۆپیک، ئاشکرای کرد وڵاتەکەی 273 هەزار بەرمیلی نەوتی هەناردە لە ڕۆژێکدا زیاد دەکات کە پێشتر بەهۆی بریارێکی رێکخراوەکەوە کەمکرابووەوە.

دەشڵێت: لەسەر راسپاردەی محەمەد شیاع سودانی سەرۆکوەزیرانی عیراق، بڕیاردراوە ئەو بڕەی کە پێشتر لە بەرهەمی هەناردەی عیراق بڕدرابوو، بگەڕێندرێتەوە، چونکە پێشترعیراق دەیتوانی تا چوار ملیۆن بەرمیل هەناردە بکات، بەڵام دوای بڕیارەکە بڕەکە بۆ چوار ملیۆن و 273 هەزار بەرمیل لە رۆژێکدا بەرز دەبێتەوە.

ڕوونیشیکردەوە: لەماوەی مانگی نیسانی 2025 تا کانوونی یەکەمی 2025، عیراق 273 هەزار بەرمیلی لە ڕۆژێکدا وەرگرتەوە.

نوێنەرەکەی عیراق ئاماژەی بەوەشکرد: زیادکردنی پشک لە رێکخراوی ئۆپیک پێویستی بە کۆبوونەوەی وەزاری و بڕیارێکی بەکۆمەڵی ئەندامانی رێکخراوەکە هەیە، بۆ ئەوەی بڕیار لە زیادکردنی پشکی وڵاتێکی ئەندام بدەن.

 لە بارەی زیادکردنی بڕی بەرهەمهێنان، محەمەد نەجار نوێنەری عیراق لە رێکخراوی ئۆپیک رایگەیاند: لە ئێستادا عیراق لەمپەری تەکنیکی هەیە، کە بەهۆیەوە ناتوانێت بڕی بەرهەمهێنان زیاد بکات، هەربۆیە ناشتوانێت داوای زیادکردنی پشکی خۆی لە رێکخراوەکە بکات.

لە کۆتاییشدا محەمەد نەجار نوێنەری عیراق لە رێکخراوی ئۆپیک رایگەیاند: هیواخوازین بڕی هەناردە زیاد بکەین،بەڵام ئەمە پێویستی بە پەرەپێدانی ژێرخانی گواستنەوە و دابەشکردن و هەناردەکردن هەیە.

PUKMEDIA