سەرۆككۆمارو سەرۆكی رەوتی حیكمە جەخت لەپێكهێنانی حكومەتێكی بەهێز دەكەنەوە

راگەیاندنی سەرۆكایەتی كۆمار

د.لەتیف جەمال رەشید، سەرۆككۆماری عیراق، عەممار حەكیم، سەرۆكی رەوتی حیكمەی نیشتمانی

د.لەتیف جەمال رەشید، سەرۆككۆماری عیراق، ئەمڕۆ یەكشەممە 30ی تشرینی دووەمی 2025، لە بەغداد، لە گەڵ سەماحەتی سەید عەمار حەكیم، سەرۆكی رەوتی حیكمەی نیشتمانی كۆبووەوە. 

لە سەرەتای دیدارەكەدا سەرۆككۆمار سوپاس و پێزانینی خۆی دەربڕی بۆ سەماحەتی عەمار حەكیم بۆ بەشداریكردنی لەپرسەی برای بەڕێزیان خوالێخۆشبوو شەماڵ جەمال رەشید.

دواتر باسیان لەدوایین پێشهاتە سیاسی و ئەمنییەكان و دانوستانە بەردەوامەكانی نێوان فراكسێۆنە سیاسییەكان كرد، بۆ گەیشتن بە كۆدەنگییەك كەڕێگە خۆش بكات بۆ جێبەجێكردنی شایستە دەستوورییەكان لەچوارچێوەیەكی روون و بەرپرسیارانەدا.

هەر لە دیدارەكەدا، جەختیان لە گرنگی یەكخستنی هەوڵەكان و  پێشخستنی بەرژەوەندی نیشتمانی و پاڵپشتیكردنی گفتوگۆی بنیاتنەر كردەوە بۆ دڵنیابوون لەپێكهێنانی حكومەتێكی بەهێز كەتوانای جێبەجێكردنی بەرنامەكانی چاكسازی و جێبەجێكردنی خواستەكانی هاووڵاتیانی هەبێت.

PUKMEDIA