ئەم هەفتەیە دەست بەدابەشکردنی مووچە دەکرێت

PUKMEDIA

مووچەی فەرمانبەران

لە دوو رۆژی داهاتوودا حکومەتی عیراق مووچەی مانگی یەک بۆ هەرێمی کوردستان دەنێرێت و راستەوخۆ دوای گەیشتنی، دەست بە دابەشکردنی مووچە دەکرێت.

 رۆژی پێنج شەممە، وەزارەتی دارایی هەرێم، بڕی 120 ملیار دیناری وەک داهاتی نانەوتی خستە سەر هەژماری وەزارەتی دارایی عیراق، چاوەڕوانیش دەکرێت لە دوو رۆژی داهاتوودا، عیراق مووچەی مانگی یەک بۆ هەرێم بنێریت.

لەو بارەیەوە، سەرچاوەیەک لە وەزارەتی دارایی هەرێم، بە PUKMEDIA ی راگەیاند، چاوەڕواندەکرێت لە رۆژانی یەک شەممە و دووشەممەی ئەم هەفتەیەدا، عیراق بڕی دیاریکراوی مووچەی مانگی یەک بۆ هەرێم بنێریت.

سەرچاوەکە راشیگەیاند، پاش گەیشتنی پارەکە، وەزارەتمان راستەوخۆ لیستی مووچە بڵاودەکاتەوە و هەوڵەکانیش بەو ئاڕاستەیەیە تا کۆتایی هەفتە، سەرجەم مووچەخۆرانی هەرێم مووچەی مانگی یەک وەربگرن.

ئەمەش لەکاتێکدایە، وەزارەتی دارایی عیراق، ئامادەکاری کردووە بۆ دابەشکردنی مووچەی مانگی دوو لە عیراق و چاوەڕواندەکرێت لەم هەفتەیەدا خانەنشینانی عیراق کە یەکەم چینن مووچە وەربگرن.

PUKMEDIA