كاره‌بای سلێمانی: بەشێکی زۆر لەخاوەن موەلیدەکان گرێبەستیان لەگەڵ کردوین

PUKMEDIA

دابەشکردنی کارەبا

به‌ڕ‌ێوه‌به‌ری كۆنتڕ‌ۆڵی كاره‌بای سلێمانی رایدەگەیەنێت، ئەو کێشانەی لە دوو رۆژی رابردوودا لەپێدانی کارەبادا دروستبوون بەهۆی بارینی یەکەم بارانەوە بووە، کە ئەوەش ئاساییە و هەموو ساڵێک ئەو کێشەیە دروستدەبێت، دەشڵێت: بەشێکی زۆر لە خاوەن موەلیدە ئەهلییەکان گرێبەستیان لەگەڵدا کردوین و لە دوو رۆژی رابردوودا کاریان کردووە.

غالب محه‌مه‌د به‌ڕ‌ێوه‌به‌ری كۆنتڕ‌ۆڵی كاره‌بای سلێمانی به‌ وێبسایتی ره‌سمیی یه‌كێتیی نیشتمانیی كوردستان PUKMEDIA ی راگه‌یاند:  پرۆژەی کارەبای 24 سەعاتی و پێدانی کارەبا بە هاووڵاتیان هیچ کێشەیەکی نییە، بەڵکو ئەو کێشانەی لە دوو رۆژی رابردوودا دروستبوون بەهۆی بارینی یەکەم بارانەوە بووە، کە ئەوەش ئاساییە و هەموو ساڵێک ئەو کێشەیە دروستدەبێت.

راشیگەیاند: خۆشبەختانە زۆر بە زوویی تیمەکانمان توانییان بەشێکی زۆری ئەو کێشانە چارەسەر بکەن، کە بەهۆی بارانەوە دروستبوون و دەتوانین بڵێین دروستبوونی کێشەکان وەک کۆنترۆڵێکی گشتی بوو، چونکە بەوهۆیەوە بەشێکی زۆر لەکێشەکانمان دۆزیەوە و چارەسەرکرد.

سەبارەت بە کارکردنی موەلیدە ئەهلییەکان لەکاتی بوونی کێشەدا، غالب محه‌مه‌د به‌ڕ‌ێوه‌به‌ری كۆنتڕ‌ۆڵی كاره‌بای سلێمانی ئاماژەی بەوەکرد، بەشێکی زۆر لە خاوەن موەلیدە ئەهلییەکان گرێبەستیان لەگەڵدا کردوین و لە دوو رۆژی رابردوودا کاریان کردووە، بەڵام بەشێکی تریان تا ئێستا گرێبەستیان لەگەڵ نەکردوین.

ئەمەش لەکاتێکدایە، كاره‌بای 24 سه‌عاتی گه‌یشتووه‌ به‌ له‌ 100% گه‌ڕ‌ه‌كه‌كانی شاری سلێمانی و نزیكه‌ی 6 مانگه‌ هاووڵاتیان كاره‌بای 24 سه‌عاتییان پێده‌ده‌رێت، هاوکات لەئێستادا بە هۆی بارینی باران و گۆڕانی کەشوهەوا خواست لەسەر بەکارهێنانی کارەبا زیادیکردووە و کێشەی بۆ پێدانی کارەبا دروستکردووە.

PUKMEDIA