قوباد تاڵەبانی: متمانەی خەڵک دەکەینە بنەمای بەدەستهێنانی مافە دەستورییەکانمان

راگەیاندنی قوباد تاڵەبانی

قوباد تاڵەبانی سەرپەرشتیاری بازنەی هەولێری لیستى یەکێتیی نیشتمانیی کوردستان

قوباد تاڵەبانى ئەندامی مەکتەبی سیاسی و سەرپەرشتیاری بازنەی هەولێری لیستى یەکێتیی نیشتمانیی کوردستان پیرۆزبایی سەرکەوتنی پرۆسەی هەڵبژاردن لە خەڵکی عیراق و هەرێمی کوردستان دەکات و رایدەگەیەنێت:" یەکێتی ئەم متمانەیەی خەڵکی کوردستان بەکاردەهێنێت بۆ بەهێزترکردنی پێگەی کورد لە عیراق و چارەسەرکردنی کێشەکانی نێوان هەرێم و بەغداد و بەدەستهێنانی مافە دەستورییەکان".

 قوباد تاڵەبانی لە پەیامەکەیدا رایگەیاند:بەڕێوەچوونی سەرکەوتووانەی پرۆسەی هەڵبژاردنی ئەنجومەنی نوێنەرانی عیراق، سەرکەوتنی هەموو خەڵکی عیراق و هەرێمی کوردستانە، بەم بۆنەیەوە پیرۆزبایی لە هەموو عیراقییەکان و بە تایبەتیش لە هاووڵاتییانی کوردستان دەکەم.

هاوکات سوپاسی بەشداری هاووڵاتیان دەکات و ئاماژە بەوە دەکات:سوپاسی ئەو بەشدارییە بەرچاوەی خەڵکی کوردستان دەکەم، سوپاس و پیرۆزباییەکی تایبەتیش بۆ هەموو دەنگدەرانی یەکێتیی نیشتمانیی کوردستان کە بە دەنگەکانیان سەنگ و پێگەی یەکێتییان لە کوردستان و عیراقدا بەهێزتر کرد، دەنگدەران و جەماوەری یەکێتی و خەڵکی کوردستان دڵنیا دەکەینەوە کە یەکێتی لە ئاستی ئەو متمانە گەورەیەدا دەبێت و بە هەموو توانایەوە کار دەکات بۆ جێبەجێکردنی بەڵێنەکانی.

لە کۆتایشدا، قوباد تاڵەبانی دووپاتی دەکاتەوە: یەکێتی ئەم متمانەیەی خەڵکی کوردستان بەکاردەهێنێت بۆ بەهێزترکردنی پێگەی کورد لە عێراق و چارەسەرکردنی کێشەکانی نێوان هەرێم و بەغدا و شەڕیش لەسەر هەموو مافە دەستورییەکانی خەڵکی کوردستان دەکەین.

PUKMEDIA