قائیمقامی کۆیە: ته‌واوكردنی پڕۆژه‌كان له‌سه‌ر ئه‌ركی ئیداره‌ی گشتی یه‌كێتی به‌رده‌وامه‌

راگەیاندنی قائیمقامیەتی قەزای کۆیە

قائیمقامی قەزای کۆیە

قائیمقامی قەزای کۆیە رایگەیاند: لەسەر راسپاردەی سەرۆک بافڵ ئیدارەی گشتی یەکێتیی نیشتمانیی کوردستان رێگربووە لە وەستانی پڕۆژە خزمەتگوزارییەکانی قەزاکە و بەردەوام پاڵپشتی دارایی بۆ کۆمپانیاکان دابیندەکات.

حاکم تاریق حەیدەری، قائیمقامی قەزای کۆیە بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: لەماوەکانی رابردوودا کۆمەڵێک کێشەمان هەبوو ئەوانیش کێشەی خەرجنەکردنی بڕی پارەی پێویستی پڕۆژەکان بوو کە ئەمەش وایکردبوو کۆمپانیاکان کارەکانیان بوەستێنن، بەڵام خۆشبەختانە سەرۆک بافڵ نوێنەری خۆی ناردە قائیمقامیەتمان و لە وردەکاری تەواوی گرفتەکانیان کۆڵییەوە و دواتر هەر لەسەر راسپاردەی سەرۆک بافڵ ئیدارەی گشتی یەکێتی دەستی بە خەرجکردنی پارەی کۆمپانیاکان کرد و پڕۆژەکان دەستییان پێکردەوە.

ئاماژەی بەوەشکرد: هاوکات لەگەڵ پاڵپشتی دارایی ئیدارەی گشتی یەکێتی لەسەر راسپاردەی قوباد تاڵەبانی، جێگری سەرۆکی ئەنجومەنی وەزیرانی هەرێم و بەهەوڵی د. ماکوان جەمیل، بەڕێوەبەری بانکی ناوەندیی هەرێم چەند جارێکی دیکە پارەی کۆمپانیاکان خەرجکراوە و رێگریکراوە لەوەی پڕۆژەکانی کۆیە بوەستن، هەروەها سەرۆک بافڵ ئەوەی سەلماند کە ئەو قسەیەی دەوترێت پڕۆژەکان تەنها بۆ پێش هەڵبژاردنن راست نییە و لەدوای هەڵبژاردنیش پڕۆژە خزمەتگوزارییەکانی کۆیە بەردەوامی هەیە.

PUKMEDIA