حکومەت 13 موڵکی دیکەی چاڤی لاند دەفرۆشێت

ئاژانسەکان

چاڤی لاند

لەبەرامبەر قەرزی کارەبا 13 موڵکی کۆمپانیای چاڤی بە زیادکردنی ئاشكرا دەفرۆشرێت، کە بڕی قەرزەکە زیاترە لە 3 ملیار و 500 ملیۆن دینار.

بەڕێوەبەرایەتی گشتی کارەبای سلێمانی لەبانگەوازنامەیەکدا رایگەیاند: لەسەر داوای بریکاری وەزیری کارەبا، لەڕێگای زیادکردنی ئاشكراوە 13 موڵکی کۆمپانیای چاڤی بۆ وەبەرهێنانی گەشتیاری دەفرۆشرێت، کە سەرجەمیان کەرتی 1ی مەڵکەندی و دەباشانن.

ئاماژەی بەوەشداوە، فرۆشتنی ئەو موڵکانە لەبەرامبەر قەرزی وەزارەتی کارەبایە کە بڕەکەی سێ ملیار و پێنج سەد و هەشتا ملیۆن و حەوت سەد و دە هەزار دینارە.

لەلایەکی ترەوە ئەوەش راگەیەندراوە: کە هەر کەسێک ئارەزووی بەشداری کردنی هەیە با سەردانی بەڕێوەبەرایەتی کارەبای سلێمانی بکات و لە بەشی ژمێریاری بارمتەی یاسایی بە ڕێژەی 10٪ی نرخی خەمڵێندراوی موڵکەکانی ئاماژەبۆکراو دابنێت و ناسنامەی نیشتیمانی و پشتگیری شوێنی نیشتەجێبوون لەگەل خۆیدا ببات.

زیادکردنەکە لە ماوەی 30 رۆژدا لە رۆژی دوای بڵاوکردنەوەی ئەم ئاگادارییە لە رۆژنامەدا لە بەڕێوەبەرایەتییەکەمان لە سەعات 12ی نیوەڕۆ ئەنجام دەدرێت.

PUKMEDIA