وەزارەتی تەندروستی هاووڵاتیانی سوریی و ئێرانی لەدەرەوەی یاسا دادەمەزرێنێت

PUKMEDIA

گردبوونەوەی پزیشکانی دانەمەزراوی گشتی دەرەوەی وڵات

ژمارەیەك میدیا بڵاویانكردەوە، بە نووسراوێكی نهێنی شەش هاووڵاتی سوریی و ئێرانی لەسەر وەزارەتی تەندروستیی هەرێمی كوردستان دامەزرێندراون، پزیشكانی دانەمەزراوی گشتیش رایدەگەیەنن: وەزیری تەندروستی بەئێمە دەڵێت كە دامەزراندن راگیراوە، كەچی بە فەرمانی نهێنی هاووڵاتی سوریی و ئێرانی دادەمەزرێنن.

ژمارەیەك میدیا لەسەر زاری پزیشكانی دانەمەزراوی گشتی لە هەرێمی كوردستان رایانگەیاندووە: ماوەی یەك ساڵە وەزارەتی تەندروستی و بەتایبەت وەزیری تەندروستی ئێمەی لە پرۆسەی دامەزراندن جیاكردووەتەوە و دەرهێناوە، لە ماوەی ئەمساڵەدا كە ژمارەمان 53 پزیشكە زیاتر لە چەندینجار خۆپیشاندان و ناڕەزایەتی و چەندین بەیاننامەو یاداشتنامەمان هەبووە، هەر لەو ماوەیەدا تووشی چەندین پێشێلكاری و لێدان و هەڕەشەكردن بووین لە بەردەم وەزارەتی تەندروستی و لە نێو وەزارەتی تەندروستی.

ئەوەشیان خستووەتەڕوو: بەداخەوە وەزیری تەندروستی ئامادە نییە بەهیچ شێوەیەك مافەكانمان بۆ بگەڕێنێتەوە، لە كاتێكدا ئەم 53 پزیشكە، هەمووی سەر بە هەرێمی كوردستانە و هەمووی خاوەن كەسوكاری شەهیدە، ئەم 53 دەرچووە لە رێگەی حوكمەتەوە خوێندنی پزیشكییان تەواو كردووە و دواتر یەكسان كردنەوەی بڕوانامەیان ئەنجامداوە و ئەندامی سەندیكای پزیشكانی هەرێمی كوردستانن، لە تازەترین لێدوانی وەزیری تەندروستی بۆ پزیشكانی ئێمە ئەوەیە كە دامەزراندن راگیراوە، لە كاتێكدا لە 2ی تشرینی دووەمی 2025، بە فەرمانی نهێنی و نووسراوێكی نهێنی شەش هاووڵاتی سوریی و ئێرانی لەسەر وەزارەتی تەندروستی هەرێم دامەزراون.

PUKMEDIA