نەتەوەیەکگرتووەکان داوای پاراستنی هاووڵاتیانی سڤیلی غەزە دەکات

میدیاکان

غەزە

نەتەوەیەکگرتووەکان هۆشداری  لە لێکەوتە مرۆییەکانی هێرشەکانی ئیسرائیل لە باکووری کەرتی غەزە دەدات و داوای پاراستنی هاووڵاتیانی شارەکە و پابەندبوون بە یاسا نێودەوڵەتییەکان دەکات

ستیفان دوجاریک، وتەبێژی سکرتێری گشتی نەتەوە یەکگرتووەکان ڕایگەیاند: فراوانکردنی هێرشە سەربازییەکەی ئیسرائیل لە غەزە، کاریگەری خراپی لەسەر هاووڵاتیان دروستکردووە کە بەدەست برسێتییەوە دەناڵێنن.

دوجاریک دووپاتی کردەوە کە پێویستە هاووڵاتیانی مەدەنی و کارمەندانی مرۆیی پارێزراو بن و هەموو لایەکیش پابەندی یاسا نێودەوڵەتییەکان بن.

لەلایەکی دیکەوە،نووسینگەی نەتەوە یەکگرتووەکان بۆ هەماهەنگی کاروباری مرۆیی (OCHA) بڵاویکردەوەهەزاران ئاوارە ناچاربوون لە ڕێگەی ڕەشیدەوە ماڵ و حاڵیان جێبهێڵن، کە تاکە دەروازەیە بۆ باشووری کەرتی غەززە.

ئۆچا ئاماژەی بەوەشکردووە، "لە چەند ڕۆژی ڕابردوودا نزیکەی 70 هەزار کەس بەرەو باشوور ئاوارەبوون ، زۆربەیان بەرەو دێر ئەلبەلا و خان یونس ئاوارە بوون، لەکاتێکدا ژمارەی ئاوارەکانی باکووری کەرتی غەزە بۆ باشوور لە ماوەی مانگی ڕابردوودا گەیشتووەتە نزیکەی 150هەزار کەس".

هاوکات فیلیپ لازارینی کۆمیساری گشتی UNRWA ئاشکرای کرد :لە ماوەی چوار ڕۆژی ڕابردوودا 10 باڵەخانەی سەر ئاژانسەکە لە شاری غەزە بۆردومان کراون، لەناویاندا حەوت قوتابخانە و دوو کلینیک کە وەکو پەناگە بۆ هەزاران کەسی ئاوارە بەکاردەهێنران". هۆشداریشیدا لەوەی "هێرشە ئاسمانییە چڕەکان دەبێتە هۆی شەپۆلی نوێی ئاوارەبوونی زیاتری هاووڵاتیان".

PUKMEDIA