عیراق بەمەرجی ناردنی 120 ملیار دینار مووچە رەوانە دەکات

راگەیاندنی ئەنجومەنی وەزیران

کۆبوونەوەی ئەنجومەنی وەزیرانی عیراق

حکومەتی فیدڕاڵی  بە مەرجی ناردنی  120 ملیار دیناری داهاتی نانەوتی بڕیاری خەرجکردنی مووچەی مانگی شەشی دا  و لیژنەیەکییش بۆ چارەسەرکردنی ناکۆکییە یاساییەکانی پێکهێنا.

نوسینگەی راگەیاندنی ئەنجومەنی وەزیرانی عیراق، ئەنجامی کۆبوونەوەی ئەمڕۆی ئەنجومەنەکەی راگەیاند و بەپێی راگەیەندراوەکە: ئەنجوومەنی وەزیرانی عیراق بە مەرجی ناردنی 120 ملیار دینار وەک داهاتی نانەوتی و بەپێی بڕیارى ئەنجوومەنی وەزیران بۆ گەنجینەی فیدراڵی، بڕیاری ناردنی مووچەی مانگی حوزەیرانی فەرمانبەرانی هەرێمی کوردستانی داوە.

هەر لە کۆبوونەوەکەدا، بڕیار لەسەر بەردەوامبوونی کارى لیژنەی هاوبەشی نێوان بەغداد و هەرێمی کوردستان و بڕیاری پێکهێنانی لیژنەیەکی یاسایی درا، کە لە راوێژکارى یاسایی ئەنجوومەنی وەزیران، سەرۆکی فەرمانگە یاساییەکانی ئەمیندارێتیی ئەنجوومەنی وەزیران و فەرمانگەی یاساییەکانی وەزارەتی دارایی و دیوانی چاودێری دارایی عیراق پێکدێت، بە هەماهەنگیی نوێنەرانی حکومەتی هەرێمی کوردستان، ئامانجی لیژنەکەش یەکلاییکردنەوەی ناکۆکییە یاساییەکانی پەیوەست بە داهاتی نانەوتییە.

بەپێی راگەیەندراوەکەی ئەنجومەنی وەزیرانی عیراق، لە کۆبوونەوەی ئەمڕۆدا گفتوگۆ لەبارەى کارى ئەو لیژنە هاوبەشە کراوە، کە لە وەزارەتی نەوت و وەزارەتی سامانە سروشتییەکان پێکهێندرابوو، تێیدا جەختیان لە پێویستی پەلەکردن و دەستبەجێ هەناردەکردنەوەی نەوتی بەرهەمهاتووی کێڵگە نەوتییەکانی هەرێمی کوردستان کردووەتەوە، بۆ ئەوەی لە رێگەی کۆمپانیای سۆمۆ و لە بەندەری جەیهانەوە هەناردە بکرێتەوە.

PUKMEDIA