کۆچبەرانی عیراق: ژمارەی کەمپەکان لە 172کەمپەوە بۆ 22 کەمیکردووە

میدیاکان

کەمپی ئاوارەکان

وەزارەتی کۆچ و کۆچبەرانی عیراق رایدەگەیەنێت ژمارەی کەمپەکان  لە 172 کەمپەوە بۆ 22 کەمپ کەمیکردووە، دووپاتیشی دەکاتەوە ئەو ئاوارانەی نەگەڕاونەتەوە کێشەی شوێنی نیشتەجێبوون و هەلیکاریان هەیە.

 کەریم نوری بریکاری وەزارەتی کۆچ و کۆچبەرانی عیراق رایگەیاند: هەندێک لەمپەر لەبەردەم گەڕانەوەی ئەو ئاوارانەدا هەیە کە لە کەمپەکانی  هەولێر و دهۆک نیشتەجێکراون، کە خۆی لە خاپور بوونی ماڵەکانیان و نەبوونی هەلیکار دەبینێتەوە، ئەمە جگە لەوەی بەشێک لە ئاوارەکان کێشەی ناکۆکی هۆزەکانیان هەیە.

دەشڵێت:" تەواوی کەمپەکانی عیراق جگە لە کەمپەکانی هەولێر و دهۆک داخراون، ئەو کەمپانەی ماون ژمارەیان 22 کەمپە و 18 کەمپیان دەکەونە ئەو دوو پارێزگایەوە.

پەیوەست بە ژمارەی کەمپەکان لە رابردوودا، بریکاری وەزارەتی کۆچ و کۆچبەران ئاشکرای کرد: لە رابردوودا ژمارەیان 172 کەمپ بوو، بەڵام بەهەوڵی هەموو لایەک لەگەڵ ویستی ئاوارەکان بۆ گەڕانەوەیان بۆ سەر ماڵ و زێدی خۆیان، ژمارەی کەمپەکان کەمکراوەتەوە.

لە کۆتایشدا، کەریم نوری بریکاری وەزارەتی کۆچ و کۆچبەران رایگەیاند  وەزارەتەکەیان ناتوانێت کاتێکی دیاریکراو بۆ کۆتاییهێنانی پرسی ئاوارەکان دیاریبکات، بەڵام هەموو هەوڵێکی خۆی دەخاتە گەڕ بە زووترین کات تەواوی کەمپەکان دابخات.

PUKMEDIA