ئەمریکا لە پاڵپشتیکردنی رۆژئاوای کوردستان بەردەوام دەبێت

The New York Times

هێزەکانی ئەمریکا لە رۆژئاوا

هێزەکانی سوریای دیموکرات رایدەگەیەنێت ئەمریکا لە پاڵپشتی کردنی  هێزەکانیان بەردەوامە و بەرپرسێکی پێشووی ئەمریکاش هۆشداری بە هێزەکانی حکومەتی دیمەشق دەدات.

سەرچاوەیەک لە هێزەکانی سوریای دیموکرات بە ماڵپەڕی (نۆرس پرێس)ی راگەیاندووە: کە ئەمریکا هیچ فشارێکی لە هێزەکانیان نەکردووە، بەڵکو چەندین کاری هاوبەش هەیە کە پێکەوە ئەنجامی دەدەن.

ئەم لێدوانەی هەسەدە دوای ئەوە دێت، کە ماڵپەڕی " میدڵ ئێست ئای" لە راپۆرتێکیدا ئاشکرای کردبوو:" ئەمریکا هۆشداری بە هێزەکانی سوریای دیموکرات داوە، کە ناتوانێت بیانپارێزێت،ئەگەر هێزەکانی حکومەتی دیمەشق هێرشیان بکاتە سەر،چونکە پابەندی رێککەوتنامەکەی 10ی ئازار نەبوون".

سەرچاوەی هێزەکانی سوریای دیموکرات، ئەوەشی راگەیاندووە: راپۆرتەکەی ماڵپەڕەکە دووبارەیە و گوزارشت لە دۆخی راستەقینەی ناوچەکە ناکات،ئامانجیش لە بڵاوکردنەوەی بەلاڕێدابردنی رای گشتییە.
روونیشی کردووەتەوە، واشنتن بوونی هێزەکانی سوریا لەناو سوپای سوریا بەگرنگ و پێویست دەزانێت،چونکە بەبێ ئەوان دۆخی کارەساتبار روودەدات.

هەر پەیوەست بە پشتگیری ئەمریکا لە هێزەکانی سوریای دیموکرات، د. وەلید فارس ڕاوێژکاری پێشووی سەرۆکی ئەمریکا بۆ هەڵبژاردن و شارەزای سیاسی، لە پۆستێکیدا کە لەپلاتفۆڕمی ئێکس بڵاویکردووەتەوە، ئاماژەی بەوەکردووە: ئەمریکا هۆشداری دەداتە هێزەکانی حکومەتی کاتی سوریا لەوەی، کە دەکرێنە ئامانجی فڕۆکە ئەمریکییەکان ئەگەر هەر هێرشێک بکەنە سەر هێزەکانی سووریای دیموکرات ئەمەش، وەک پابەندبوونێک بە هاوبەشی لە شەڕی دژ بە داعش.

ئەمەش لەکاتێکدایە، کە هەفتەی رابردوو گرژی و ئاڵۆزی لە نێوان هێزەکانی سوریای دیموکرات و هێزەکانی حکومەتی دیمەشق روویداوە و بەهۆیەوە چەند چەکدارێکی حکومەت کوژران.

PUKMEDIA