یاسایه‌ك له‌باره‌ی گه‌ڕ‌انه‌وه‌ی ئه‌ندامانی پارتی كرێكاران بۆ توركیا داده‌ڕ‌ێژرێت

میدیاکان

چه‌كدارانی پارتی كرێكارانی كوردستان

پارتی دادوگه‌شه‌پێدان یاسایه‌ك بۆ پڕ‌ۆسه‌ی ئاشتی ئاماده‌ ده‌كات و بنه‌مای یاسایی بۆ گه‌ڕانه‌وه‌ی چه‌كدارانی پارتی كرێكارانی كوردستان داده‌ڕێژێت.

دوابه‌دوای بڕ‌یاره‌كه‌ی پارتی كرێكارانی كوردستان (په‌*كه‌*كه‌) بۆ دانانی چه‌ك، كۆمسیۆنی هاوپشتیی نیشتمانی و برایه‌تی و دیموكراسی له‌ئه‌نجومه‌نی نیشتمانیی گه‌وره‌ی توركیا ده‌ستی به‌كاره‌كانی كردوه‌ بۆ دامه‌زراندنی چوارچێوه‌ی یاسایی، هاوكات پارتی ده‌سه‌ڵاتدار كار له‌سه‌ر پێشنیاره‌كانی رێكاره‌ یاساییه‌كان ده‌كات.

له‌و چوارچێوه‌یه‌شدا پارتی داد و گه‌شه‌پێدان به‌نیازه‌ رێكاری گه‌ڕ‌انه‌وه‌ی ئه‌ندامانی په‌*كه‌*كه‌ بۆ توركیا و تێكه‌ڵبوونیان به‌كۆمه‌ڵگا بگرێته‌به‌ر، هاوكات به‌نیازه‌ ئه‌ندامه‌كانی پارتی كرێكارانی كوردستان، له‌چوارچێوه‌ی یاسادا له‌ رێكخراوێكدا كۆبكاته‌وه‌.

ئامانج له‌ یاساكه‌ دامه‌زراندنی بنه‌مای یاساییه‌ بۆ گه‌ڕانه‌وه‌ی چه‌كدارانی پارتی كرێكارانی كوردستان بۆ توركیا له‌پاش چه‌كدانانیان.

كۆمیسیۆنی هاوپشتی نیشتمانی و برایه‌تی و دیموكراسی (NSD)ی ئه‌نجومه‌نی نیشتمانی گه‌وره‌ی توركیا دامه‌زرا و بڕیاره‌ ئه‌مڕ‌ۆ 12ی8ی2025 سه‌عات 2:00ی پاشنیوه‌ڕ‌ۆ سێیه‌مین كۆبوونه‌وه‌ی خۆی ئه‌نجامبدات.

PUKMEDIA سه‌رچاوه‌/ بی بی سی تورك