سه‌رۆكی رۆحیی دروزه‌كان داوایه‌ك ئاڕاسته‌ی ئه‌مریكا و ئه‌نجومه‌نی ئاسایش ده‌كات

ئاژانسەکان

شێخ حیكمه‌ت هیجری سه‌رۆكی رۆحیی دروزه‌كان

سه‌رۆكی رۆحیی دروزه‌كان داوا له‌ نه‌ته‌وه‌یه‌كگرتووه‌كان و ئه‌نجومه‌نی ئاسایشی نێوده‌وڵه‌تی ده‌كات كه‌ لێكۆڵینه‌وه‌ له‌و رووداوانه‌ بكه‌ن كه‌ له‌ سوه‌یدا رووده‌ده‌ن و داواش ده‌كات هاووڵاتیانی مه‌ده‌نی بپارێزرێت.

شێخ حیكمه‌ت هیجری سه‌رۆكی رۆحیی دروزه‌كان، رایده‌گه‌یه‌نێت: "ئێمه‌ داوا له‌نه‌ته‌وه‌یه‌كگرتووه‌كان و ئه‌نجومه‌نی ئاسایشی نێوده‌وڵه‌تی ده‌كه‌ین، كه‌ ده‌ستبه‌جێ كۆتایی به‌م بێده‌نگییه‌ كوشنده‌یه‌ بهێنن، كه‌ به‌رامبه‌رمان ده‌كرێت، داوا ده‌كه‌ین به‌كردنه‌وه‌ی لێكۆڵینه‌وه‌یه‌كی نێوده‌وڵه‌تی سه‌ربه‌خۆ سه‌باره‌ت به‌و تاوانانه‌ی، كه‌ له‌ سوه‌یدا ئه‌نجامدراون، هه‌روه‌ها ره‌وانه‌كردنی تێوه‌گلاوان له‌م تاوانانه‌ بۆ دادگای تاوانی نێوده‌وڵه‌تی".

سه‌رۆكی رۆحیی دروزه‌كان داواش ده‌كات: "ناردنی وه‌فدی چاودێری نێوده‌وڵه‌تی بۆ پاراستنی هاووڵاتیانی مه‌ده‌نی، هه‌روه‌ها هه‌وڵی راگرتنی هه‌موو جۆره‌كانی پشتیوانی سیاسی و سه‌ربازی بۆ ئه‌و گرووپه‌ تیرۆرستییانه‌ی كه‌ له‌ ده‌وروبه‌ری سوه‌یدان بدرێت، له‌گه‌ڵ ئه‌وه‌شدا روو له‌ وڵاتانی گه‌ره‌نتیكار ده‌كه‌ین بۆ فشارخستنه‌ سه‌ر حكومه‌تی دیفاكتۆی سوریا بۆ پابه‌ندبوون به‌ رێككه‌وتنی ئاگربه‌ست و دووباره‌نه‌كردنه‌وه‌ی پێشێلكاری و ده‌ستدرێژییه‌كان، كه‌ له‌كاتی به‌رقه‌راربوونی ئه‌م رێككه‌وتنه‌دا روویانداوه‌، كه‌ ئێمه‌ پێوه‌ی پابه‌ند بووین".

شێخ حیكمه‌ت هیجری جه‌ختیش ده‌كاته‌وه‌، له‌سه‌ر پێویستی كشانه‌وه‌ی هه‌موو میلیشیا و گروپه‌ چه‌كداره‌كان بۆ ده‌ره‌وه‌ی سنووری ئیدارەی سوه‌یدا بۆ مسۆگه‌ركردنی گه‌ڕ‌انه‌وه‌ی رۆڵه‌كانمان بۆ گوند و ماڵه‌كانیان.

PUKMEDIA