ئه‌رمینیا و ئازه‌ربایجان رێككه‌وتنی نێوانیان ئیمزا كرد

میدیاکان

وێنەیەکى کاتى رێکەوتنەکە

دوای هێوركردنه‌وه‌ی بارودۆخه‌كه‌، ئه‌رمینیا و ئازه‌ربایجان له‌ واشنتۆن و به‌ئاماده‌بوونی دۆناڵد تره‌مپ سه‌رۆكی نه‌ته‌وه‌یه‌كگرتووه‌كانی ئه‌مریكا رێككه‌وتنی نێوانیان ئیمزاكرد كه‌ له‌ حه‌وت خاڵ پێكهاتووه‌.

ده‌قی به‌یاننامه‌ی هاوبه‌شی هه‌ردوو وڵات.....

ئێمه‌، سه‌رۆك كۆماری ئازه‌ربایجان و سه‌رۆك وه‌زیرانی كۆماری ئه‌رمه‌نستان، له‌ 8 ی ئابی 2025 له‌ واشنتۆنی پایته‌ختی ویلایه‌ته‌ یه‌كگرتووه‌كانی ئه‌مریكا كۆبووینه‌وه‌، ره‌زامه‌ندین له‌سه‌ر ئه‌م خاڵانه‌.

 1-ئێمه‌ و سه‌رۆكی ویلایه‌ته‌ یه‌كگرتووه‌كانی ئه‌مریكا دۆناڵد تره‌مپ شاهیدی ئیمزاكردنی ده‌قی ڕ‌ێكه‌وتننامه‌ی ئاشتی و په‌یوه‌ندییه‌كانی نێوان كۆماری ئازه‌ربایجان و كۆماری ئه‌رمه‌نستان بووین له‌لایه‌ن وه‌زیرانی ده‌ره‌وه‌ی هه‌ردوولاوه‌ ئاماده‌كراوه‌، له‌م ڕ‌ووه‌شه‌وه‌ دانمان به‌پێویستی به‌رده‌وامی كاری زیاتردا نا بۆ گه‌یشتن به‌ ئیمزاكردن و په‌سه‌ندكردنی ڕ‌ێككه‌وتننامه‌كه‌ و جه‌ختمان له‌سه‌ر گرنگی پاراستن و به‌هێزكردنی ئاشتی نێوان هه‌ردوو وڵاته‌كه‌مان كرده‌وه‌.

2- هه‌روه‌ها شاهیدی ئیمزاكردنی داواكاری هاوبه‌ش بۆ ڕ‌ێكخراوی ئاسایش و هاوكاری ئه‌وروپا (OSCE) بووین سه‌باره‌ت به‌داخستنی پرۆسه‌ی مینسك و پێكهاته‌كانی په‌یوه‌ندیدار له‌لایه‌ن وه‌زیرانی ده‌ره‌وه‌ی كۆماری ئه‌رمه‌نستان و كۆماری ئازه‌ربایجان ئاماده‌كراوه‌و داوا له‌ هه‌موو وڵاتانی به‌شداربووی OSCE ده‌كه‌ین ئه‌م بڕ‌یاره‌ په‌سه‌ند بكه‌ن.

3- دووپاتمان كرده‌وه‌ له‌سه‌ر گرنگیدانی زیاتر به‌په‌یوه‌ندییه‌كانی نێوان هه‌ردوو وڵات بۆ گواستنه‌وه‌ی ناوخۆیی و دوولایه‌نه‌ و نێوده‌وڵه‌تی بۆ به‌ره‌وپێشبردنی ئاشتی و سه‌قامگیری و خۆشگوزه‌رانی له‌ ناوچه‌كه‌ و دراوسێكانمان له‌سه‌ر بنه‌مای ڕ‌ێزگرتن له‌ یه‌كپارچه‌یی ناوخۆیی و ناوچه‌یی و ده‌سه‌ڵاتی دادوه‌ری كۆماری ئه‌رمه‌نستان و كۆماری ئازه‌ربایجان. ئه‌مه‌ش بریتییه‌ له‌ په‌یوه‌ندی بێسنوور له‌نێوان به‌شی سه‌ره‌كی كۆماری ئازه‌ربایجان و كۆماری خۆبه‌ڕ‌ێوه‌به‌ری ناخچیوان له‌ ڕ‌ێگه‌ی خاكی كۆماری ئه‌رمه‌نستانه‌وه‌ له‌گه‌ڵ سوودی دوولایه‌نه‌ بۆ په‌یوه‌ندی نێوده‌وڵه‌تی و ناوخۆیی كۆماری ئه‌رمه‌نستان.

4- كۆماری ئه‌رمه‌نستان له‌گه‌ڵ ویلایه‌ته‌ یه‌كگرتووه‌كانی ئه‌مریكا و لایه‌نه‌ سێیه‌مه‌كان كار ده‌كات بۆ داڕ‌شتنی چوارچێوه‌یه‌ك بۆ پڕ‌ۆژه‌ی "ڕ‌ێگای ترامپ بۆ ئاشتی و خۆشگوزه‌رانی نێوده‌وڵه‌تی" (TRIPP) له‌ خاكی كۆماری ئه‌رمه‌نستان، ئێمه‌ دڵنیایی خۆمان دووپاتده‌كه‌ینه‌وه‌ بۆ به‌رده‌وامبوون له‌ هه‌وڵه‌كان به‌ نیازپاكی بۆ گه‌یشتن به‌م ئامانجه‌ به‌خێراترین شێوه‌.

5- ئێمه‌ دان به‌وه‌دا ده‌نێین كه‌ پێویسته‌ ڕ‌ێگه‌یه‌ك دابڕ‌ێژین بۆ ئاینده‌یه‌كی گه‌ش كه‌ به‌ ململانێی ڕ‌ابردووه‌وه‌ نه‌به‌سترێته‌وه‌، له‌گه‌ڵ په‌یماننامه‌ی نه‌ته‌وه‌ یه‌كگرتووه‌كان و جاڕ‌نامه‌ی ئالماتی ساڵی 1991 بگونجێت، هه‌روه‌ها له‌ئێستادا هه‌لومه‌رج بۆ گه‌له‌كانمان ڕ‌ه‌خساوه‌ بۆ ئه‌وه‌ی له‌ كۆتاییدا ده‌ست بكه‌ن به‌ بونیاتنانی په‌یوه‌ندیی دراوسێیه‌تی باش له‌سه‌ر بنه‌مای بێسنووری سنووره‌ نێوده‌وڵه‌تییه‌كان و ڕ‌ێگه‌نه‌دان به‌ به‌كارهێنانی هێز بۆ ده‌ستبه‌سه‌رداگرتنی ناوچه‌كان له‌ دوای ئه‌و ململانێیه‌ی كه‌ ئازارێكی گه‌وره‌ی مرۆیی به‌دوای خۆیدا هێنا، ئه‌م راستییه‌ هه‌رگیز پێداچوونه‌وه‌ی بۆ ناكرێت و نابێت هه‌رگیز پێداچوونه‌وه‌ بكرێت، چونكه‌ ڕ‌ێگه‌ خۆشكه‌ر ده‌بێت بۆ داخستنی دژایه‌تی نێوان هه‌ردوو گه‌له‌كه‌مان، ئێمه‌ به‌ توندی هه‌ر هه‌وڵێكی تۆڵه‌سه‌ندنه‌وه‌ له‌ئێستا و داهاتوودا ره‌تده‌كه‌ینه‌وه‌. 

6- ئێمه‌ متمانه‌یی خۆمان ده‌رده‌بڕ‌ین كه‌ ئه‌م لووتكه‌یه‌ بناغه‌یه‌كی به‌هێزه‌ بۆ ڕ‌ێزی هاوبه‌ش و به‌ره‌وپێشبردنی ئاشتی له‌ ناوچه‌كه‌دا.

7- سوپاسگوزاری زۆر بۆ دۆناڵد تره‌مپ، سه‌رۆكی ویلایه‌ته‌ یه‌كگرتووه‌كانی ئه‌مریكا ده‌رده‌بڕ‌ین بۆ میوانداریكردنی ئه‌م لووتكه‌ گرنگه‌ و به‌شدارییه‌ به‌رچاوه‌كانی له‌ به‌ره‌وپێشبردنی ئاساییكردنه‌وه‌ی په‌یوه‌ندییه‌ دووقۆڵییه‌كانی نێوان كۆماری ئازه‌ربایجان و كۆماری ئه‌رمه‌نستان.

PUKMEDIA / ئا.. هێمن مام ره‌ش