سوریا و ئیسرائیل بەشێوەی راستەوخۆ لە ئازەربایجان کۆدەبنەوە

میدیاکان

ئەسعەد شەیبانی وەزیرى دەرەوەی سوریا و رۆن دێرمەر وەزیرى کاروباری ستراتیجی ئیسرائیل

بڕیارە ئەمڕۆ 31ی7ی2025،وەزیری دەرەوەی سوریا و وەزیرى کاروبارى ستراتیجی ئیسرائیل لە باکۆی پایتەختی ئازەربایجان کۆببنەوە، کە دەبێتە دووەم کۆبوونەوەی راستەوخۆی ئەو دوو وڵاتە.

بەپێی سەرچاوە هەواڵییەکان، کۆبوونەوەکە لەسەر ئاستی وەزیرانی ئەو دوو وڵاتە دەبێت ئەسعەد شەیبانی وەزیرى دەرەوەی سوریا و رۆن دێرمەر وەزیرى کاروباری ستراتیجی، نوێنەرایەتی وڵاتەکانیان دەکەن لە کۆبوونەوەکەدا.

ناوەڕۆکی کۆبوونەوەکەش تایبەت دەبێت بە رەوشی ئەمنیی سوریا، بە تایبەت رەوشی ناوچەکانی باشوری وڵاتەکە و دۆخی پارێزگای سوەیدا کە لە 13ی ئەم مانگەوە بە دۆخێکی ئاڵۆزدا تێدەپەڕێت، لەگەڵ باسکردنی پەیوەندییەکانی نێوان هەردوو وڵات.

دوای کەوتنی رژێمەکەی بەشار ئەسەد، سوریا و ئیسرائیل چەندین جار کۆبوونەتەوە و هەفتەی رابردووش هەردوو وەزیرە سوری و ئیسرائیلییەکە لە پاریسی پایتەختی فەرەنسا بە سەرپەرشتیی ئەمریکا کۆبوونەوە، هەروەها لە پەراوێزی سەردانەکەی ئەحمەد شەرع بۆ ئازەربایجان، بەرپرسانی هەردوو وڵات لە باکۆی پایتەخت کۆبوونەوەیەکی دیکەیان ئەنجامدا، کە بە یەکەم کۆبوونەوەی راستەوخۆی نێوان ئەو دوو وڵاتە دادەنرێت لە دوای دەسەڵاتی نوێی دیمەشق.

PUKMEDIA