بەهۆى لافاوەکەى چینەوە 30 کەس گیانیان لەدەستدا

میدیاکان

وێنەیەکى لافاوەکە

 بارانێکی بەخوڕ شارى په‌كینی پایته‌ختی چینى گرتووەتەوە، بەهۆیەوە لافاو دروستبووە، کە بەگوێرەی میدیاکانى وڵاتەکە 30 کەس گیانیان لەدەستدا و زیاتر لە 80 هەزار کەسیش ئاوارەبوون، هۆشداری لە خراپتربوونی دۆخەکەش دراوە.

میدیاکانى چین بڵاویانکردووەتەوە رۆژی دووشەممە 28ی 7ی 2025، بارانێکی بەخوڕ پەکین و ژمارەیەک پارێزگای دیکەی وڵاتەکەی گرتووەتەوە، کە بە هۆیەوە 30 کەس لە پەکینی پایتەختی وڵاتەکە گیانیان لەدەستداوە و زیاتر لە 80 هەزار کەس بە ناچاری شوێنەکانیان بەجێهێشتووە.

ئاماژەبەوەشدراوە، دەیان رێگا داخراون و زیاتر لە 130 گوند بێ کارەبا بوون، پێشبینیش دەکرێت تاوەکو رۆژی چوارشەممە باران بەردەوام بێت.

پێشتر شی جینپینگ سه‌رۆكی چین داوای له‌ ده‌سه‌ڵاتداران كردبو، رێوشوێنی پێویست بگرنه‌به‌ر بۆ رێگریكردن له‌ لافاو و نه‌هێشتنی لێكه‌وته‌كانی كاره‌ساتی سروشتی.

PUKMEDIA