دانیمارك 3.4 ملیۆن دۆلار بۆ هەڵگرتنەوەی مین لە عیراق دابیندەکات

ئاژانسەکان

وێنەیەکى پڕۆسەى پشکنین و مین هەڵگرتنەوە

حكومەتی دانیمارك بۆ پشتگیریکردنى هەوڵەكانی هەڵگرتنەوە و پاککردنەوەی خاکی عیراق لە مین بڕیاریداوە بە تەرخانکردنی 3.4 ملیۆن دۆلار لە رێگەی نەتەوەیەكگرتووكانەوە.

پێر لۆدامەر سەرۆکی رێکخراوی نەتەوە یەکگرتووەکان بۆ کاروباری مین (UNMAS)، رایگەیاندووە: "پێشوازی لە بڕیارێکی حكومەتی دانیمارك دەكەین بۆ تەرخانکردنی بڕی سێ ملیۆن و 400 هەزار دۆلاری ئەمریکی تایبەت بە پرسی هەڵگرتنەوە و پاککردنەوەی خاکی عیراق لە مین".

حکومەتی دانیمارک بۆ بەشداریكردن لە هەوڵەكانی هەڵگرتنەوەی مین لە عیراق ئەو پارەیەی تەرخانکردووە، ئەوەش بە ئامانجی پاراستنی کەسانی مەدەنی لە مەترسییەكانی مین و ئاوەدانكردنەوەی ئەو ناوچانەی بەهۆی مینەوە زیانیان بەركەوتووە.

عیراق تا ئێستاش یەکێکە لەو وڵاتانەی کە زۆرترین رێژەی مین و پاشماوەی جەنگی تێدا بەجێماوە، بەپێی ئاماری بەڕێوبەرایەتی چالاکی مین لە عیراق (DMA) و دەزگاى گشتى کاروبارى مین لە هەرێمى کوردستان (IKMAA) زیاتر لە دوو هەزار و 723 کیلۆمەتر چوارگۆشە لە سەرانسەری عیراق و هەرێمی کوردستان بە جۆرەکانی مین داپۆشراوە، ئەم مەترسیانە بە بەردەوامی هەڕەشەن بۆ سەر ژیانی خەڵک و دەستگەیشتنیان بە خزمەتگوزارییە سەرەکییەکان، هەروەها رێگری لە بوژانەوە و گەشەسەندنی ئابووری دەکەن.

لە ساڵی 2015 وە تاوەکو ئێستا حکومەتی دانیمارک بڕى زیاتر لە 41 ملیۆن دۆلاری ئەمریکی بەخشیوە بە عیراق بۆ هەمان مەبەست.

PUKMEDIA