نی رووچی: پەرە بەپەیوەندییەكانمان لەگەڵ یەكێتی دەدەین

نی رووچی كونسوڵی گشتی كۆماری گەلیی چین لە هەولێر

كونسوڵی گشتی كۆماری گەلیی چین لەهەولێر لەبارەی پەیوەندییەكانی نێوان پارتی كۆمۆنیستی چین و یەكێتیی نیشتیمانیی كوردستان ئاماژە بۆ ئەوەدەكات:" ئامادەین پەرەی زیاتر بە پەیوەندییەكانمان لەگەڵ یەكێتی بدەین، چونكە نەریتێكی مێژووییەو سەرۆك مام جەلال دامەزرێنەرێتی و دەیپارێزین.

نی رووچی كونسوڵی گشتی كۆماری گەلیی چین لەهەولێر لەچاوپێكەوتنێكدا لەگەڵ رۆژنامەی كوردستانی نوێ كە لەژمارە 8804  بڵاوكراوەتەوە دەڵێت:" پارتی  كۆمۆنیستی چین و یەكێتیی نیشتیمانی كوردستان ئاڵوگۆڕی دۆستانە وەك نەریتێكی مێژوویی دەپارێزن، مام جەلال تاڵەبانی، دامەزرێنەر و سكرتێری گشتی یەكێتیی نیشتیمانیی كوردستان،  یەكەم ســەرۆك كۆماری عیراق بوو كە سەردانی چینی كرد لە دوای  دامــەزرانــدنــی پەیوەندی دیپلۆماسی نــێــوان هـــەردوو  وڵات، بەشدارییەكی گەورەی لەئاڵوگۆڕ و هەماهەنگی نێوان هــەردوولادا دەستیپێكرد".

" پارتی  كۆمۆنیستی چین  ئامادەیە پەرەی زیاتر بە پەیوەندی دۆستانە لەگەڵ یەكێتیی نیشتیمانیی كوردستان بدات و ئاڵوگۆڕی پارتەكان لە نێوان یەكتردا پتەوتر بكات و پێكەوە كار بكەن، بۆ  بەرەنگاربوونەوەی  هەموو جۆرە ئاستەنگێكی جیهانی" كونسوڵی گشتی كۆماری گەلیی چین لە هەولێر وای وت.

نی رووچی دەشڵێت:"پارتی كۆمۆنیستی چین،پابەندە بە پراكتیزەكردنی خواست و ئەركی رەسەنی پارت و پەیامەكەی، ئاڵوگۆڕی ئەزموون لە حوكمڕانی حزب و دەوڵەت لەگەڵ لایەنە سیاسییەكان لە  سەرانسەری  جیهان، كاركردن لەگەڵیان بۆ پێشخستنی شارستانییەتی مرۆیی و پێشكەوتن پێكەوە،  لەنێو ئەو  حزبانەشدا  یەكێتی  نیشتیمانی كوردستانە".

پێتشر باڵیۆز د.محه‌مه‌د سابیر دیپلۆماتكار و باڵیۆزی پێشووی عیراق له‌ چین له‌چاوپێكه‌وتنێكی PUKMEDIA وتی:"پێویسته‌ یه‌كێتی پرسی كردنه‌وه‌ی بیرۆی یه‌كێتی له‌ په‌كین زیندووبكاته‌وه‌ و بناغه‌كه‌ی دانراوه‌و حكومه‌تی چین رازییه‌ یه‌كێتی بیرۆی له‌و وڵاته‌ هه‌بێت، ئه‌ویش له‌رێگه‌ی نوسینگه‌ی بازرگانیه‌وه‌یه‌و نوێنه‌ری یه‌كێتیی كاره‌كان به‌ڕێوه‌ببات".

باڵیۆزی پێشووی عیراق له‌ چین ده‌ڵێت: "یه‌كێتی یه‌كه‌مین حزب بوو له‌سه‌ر ئاستی عیراق و هه‌رێمی كوردستان كه‌ په‌یوه‌ندی دێرین و مێژوویی له‌گه‌ڵ حزبی كۆمۆنیست و حكومه‌تی چین دا هه‌بوو، سه‌رۆك مام جه‌لالیش ئه‌و په‌یوه‌ندییه‌ی دروستكردوه‌" و داواده‌كات: "هه‌ڤاڵ بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان ئه‌و په‌یوه‌ندییه‌ توندوتۆڵتر بكات و سه‌ردانی كۆماری گه‌لی چین بكات و گه‌وره‌به‌رپرسانی حزبی كۆمۆنیستی چین ببینێت".

"حزبی كۆمۆنیستی چین، ساڵانه‌ بودجه‌یه‌كی تایبه‌تی بۆ یه‌كێتیی نیشتمانیی داناوه‌ بۆ سه‌ردانی وه‌فدێكی باڵای سیاسی و وه‌فدێكی كادرانی راگه‌یاندن و پێویسته‌ ئه‌و په‌یوه‌ندییه‌ رێكبخرێته‌وه‌، چونكه‌ مام جه‌لال وته‌نی "چین گرنگه‌"". باڵیۆز د. محه‌مه‌د وایوت.
PUKMEDIA