بیرمەندێكی كورد لەبواری فیزیا پۆستێكی باڵای زانستی لە كەنەدا وەردەگرێت

پرۆفیسۆر ئیبراهیم كەریمی بیرمەندی جیهانی لەبواری فیزیا وەك سەرۆكی پەیمانگای كوانتۆمی كەنەدا دیاری كرا.

لەوبارەیەوە پرۆفیسۆر ئیبراهیم كەریمی ڕایگەیاند: پەیمانگەكە لە ئاستێكی هەر بەرزی بواری فیزیایە و بە تایبەت بەشی كوانتۆمی هەیە.

پرۆفیسۆر ئیبراهیم كەریمی لە شاری سەقز لە ڕۆژهەڵاتی كوردستان لەدایكبووە و لە جیهاندا وەك بیرمەندێكی بواری فیزیا ناسراوە و خاوەنی چەندین بیری نوێیە لە بواری فیزیا و دەیان خەڵاتی و ڕێزلێنانی نێودەوڵەتی پێبەخشراوە و میدالیای هێرزبێرگی فیزیای لە كەنەندا پێبەخشرا و ئەندامی ئەنجومەنی پاشایەتی بیرمەندانی كەنەندایە. 

پرۆفیسۆر ئیبراهیم كەریمی ساڵی 1979 لە شاری سەقز لە دایكبووە و قۆناغەكانی خویندنی هەر لەو شارە تەواو كردووە و دواتر هۆگری فیزیا دەبێت و بەشداری لە چەندین كۆنفرانسی فیزیا دەكات و چەندین بیرۆكەی نوێی فیزیایی دەخاتەڕوو و لە زانكۆی كرمان لە بەشی فیزیا وەك خوێندكاری نموونە دەستنیشان دەكرێت و هاوكات لەگەڵ فیزیا، بیركاریش تەواو دەكات و دواتر چەندین زانكۆی ئەوروپایی ئامادەیی خۆیان بۆ وەرگرتنی دەردەبڕن و پاشان دەچێتە ئیتالیا و لە ماوەی دوو ساڵ و نیو دكتۆرا وەردەگرێت لە بواری فیزیا و چەند داهێنانێكی نێودەوڵەتی بەناوی ئەو تۆمار دەكرێت. 

پرۆفیسۆر كەریمی دواتر لەگەڵ پرۆفیسۆر رابێرت بوید ناوەندی لێكۆڵینەوەی پێشكەوتووی فۆتۆنیك لە ئۆتاوی كەنادا دادەمەزرێن و دەچێتە كەنەدا و دەبێتە مامۆستای زانكۆ لە بەشی فیزیا و دەبێتە خاوەنی كورسی لێكۆڵینەوە بۆ ماوەی پێنج ساڵ و دوو خەڵاتی گرنگ لە داهێنانی فیزیایی وەردەگرێت. 

ساڵی 2020 خەڵاتی هێرزبێرگی فیزیای پێدەبەخشرێت. 

PUKmedia باشیلا جەعفەر