هەڵەبجە.. ساڵیادی هەفتەبازاڕی كێڵگەی كوردستان دەكرێتەوە

بەیانی ئەمڕۆ 1-7-2022 بە ئامادەبوونی بێگەرد تاڵەبانی وەزیر كشتوكاڵ و سەرچاوەكانی ئاو و ئازاد تۆفیق پارێزگاری هەڵەبجە و ژمارەیەك لە بەرپرسانی حزبی و حكومی و ژمارەیەك لە جوتیارانی نموونە لە هەڵەبجە ساڵیادی هەفتە بازاڕی كێڵگەی كوردستان بەڕێوەچوو و هاوكاتیش ماڵی پاشاش كرایەوە. 

بێگەرد تاڵەبانی وەزیری کشتوکاڵی ھەرێم لەوتەیەکدا رایگەیاند: وەزارەتەکەی کۆمەڵێک ھەنگاوی ناوە بۆ گەڕاندنەوەی بنەچەی کشتوکاڵکردن و بەرزکردنەوەی ئاستی کوالیتی و ناساندنی بە وڵاتانی دەرەوە.

وتیشی، لە سێ ساڵی رابردوودا توانیویانە ئاستی سەرمایەگوزاری لە بواری پەرەپێدانی کەرتی کشتوکاڵ لە ١.٨% بەرزبکەنەوە بۆ نزیکەی ١٠%. ھەروەھا لەگەڵ کۆمپانیایەکی گەورەی ئەمریکی ھەماھەنگییەکان کردووە بۆ پەرەپێدانی توانای جوتیارانی ھەڵەبجەو پێنجوێن و شارەزوور لە بەرھەمھێنانی پەتاتە بۆ ئەوەی چیتر پێویستیان بە ھاوردەکردنی نەبێت.

وەزیری کشتوکاڵ راشیگەیاند، سەرقاڵی توێژینەوەیەکی گرنگن لەسەر ھەناری ھەڵەبجە و لەگەڵ ئیماراتییەکان و جوتیاران لیژنەیەک پێکھێنراوە تاکو کوالیتییەکەی بەرزبکەنەوەو وەک براندێک ھەناردەی دەرەوەی بکەن.
PUKmedia فەرحان حەمەخان