خاتوو شاناز پشتیوانییه‌كانی بۆ به‌ره‌وپێشچوونی پڕۆسه‌ی په‌روه‌رده‌ دووپاتده‌كاته‌وه‌

ئه‌مڕۆ ٢٩ی حوزه‌یرانی ٢٠٢٢، خاتوو شاناز ئیبراهیم ئه‌حمه‌د كارگێڕی مه‌كته‌بی سیاسی (ی.ن.ك) و سه‌رپه‌رشتیاری مه‌ڵبه‌نده‌كانی (سلێمانی، چه‌مچه‌ماڵ، شاره‌زوور، گه‌رمیان و راپه‌ڕین)، له‌ نووسینگه‌ی تایبه‌تی خۆی له‌ شاری سلێمانی، چاویكه‌وت به‌ مامۆستا چنار حه‌سه‌ن به‌ڕێوه‌به‌ری كۆمه‌ڵگه‌ی په‌روه‌رده‌یی كوردستان و ستافی ئیداری كۆمه‌ڵگه‌كه‌.

له‌ دیدارێكدا، به‌ڕێوه‌به‌ر و ستافی كارگێڕی كۆمه‌ڵگه‌كه‌، پوخته‌یه‌كیان له‌باره‌ی چۆنێتی پێشكه‌شكردنی خزمه‌ت و كار و پلانه‌كانیان بۆ به‌ره‌وپێشبردنی پڕۆسه‌ی په‌روه‌رده‌ و پێگه‌یاندنی نه‌وه‌یه‌كی هۆشیار به‌ زانست و زانین له‌ كۆمه‌ڵگه‌كه‌دا باسكرد، له‌ به‌رامبه‌ردا خاتوو شاناز ئیبراهیم ئه‌حمه‌د، سوپاس و ده‌ستخۆشی پێشكه‌شكردن كه‌ به‌وپه‌ڕی دڵسۆزییه‌وه‌، ئه‌رك و به‌رپرسیارێتییان راده‌په‌ڕێنن له‌ په‌روه‌رده‌كردن و گۆشكردنی منداڵان به‌ زانست و زانیاری و په‌روه‌رده‌یه‌كی ته‌ندروست.

دواتر، چه‌ند پرسێكی تایبه‌ت به‌ كۆمه‌ڵگه‌ و به‌ره‌وپێشچوونی پڕۆسه‌ی په‌روه‌رده‌ و فێركردن له‌ كۆمه‌ڵگه‌كه‌دا تاوتوێ كرا و خاتوو شاناز پشتیوانیی خۆی ده‌ربڕی، بۆ ئه‌و پێشنیازانه‌ی كه‌ پێشكه‌شیان كرد.

PUKmedia تایبه‌ت