بافڵ تاڵه‌بانی: خزمه‌تكردنی هێزه‌كانی پێشمه‌رگه‌ به‌ ئه‌ركی خۆمان ده‌زانین

بافڵ تاڵه‌بانی، هاوسه‌رۆكی یه‌كێتیی نیشتمانیی كوردستان له‌ قه‌ڵاچوالان به‌ ئاماده‌بوونی شێخ جه‌عفه‌ر شێخ مسته‌فا، جێگری سه‌رۆكی ھه‌رێمی كوردستان و مسته‌فا چاوڕه‌ش، فه‌رمانده‌ی ھێزه‌كانی حه‌فتا و مه‌حمود سه‌نگاوی، سه‌رپه‌رشتیاری ھێزه‌كانی حه‌فتا و عه‌بدوڵا كانی به‌ردی، لێپرسراوی مه‌ڵبه‌ندی رێكخستنی پێشمه‌رگه‌ و ھیوا عه‌بدوڵا، لێپرسراوی میحوه‌ری چواری كه‌ركوكی ھێزی پێشمه‌رگه‌ له‌گه‌ڵ ئامرلیواكانی ھێزی پێشمه‌رگه‌ كۆبووه‌وه‌.

له‌ كۆبوونه‌وه‌كه‌دا بافڵ تاڵه‌بانی باسی له‌ گرنگی و رۆڵی فه‌رمانده‌كانی پێشمه‌رگه‌ كرد و وتی: ئێوه‌ پارێزه‌ر و خاوه‌نی یه‌كێتین و ئێمه‌ مێژووی پڕ له‌ خه‌بات و شانازی ئێوه‌ له‌ یادناكه‌ین. له‌ هه‌وڵه‌كانمان به‌رده‌وامین بۆ پێداچوونه‌وه‌ و رێكخستنه‌وه‌ی یه‌كه‌كان و به‌ره‌وپێشچوونی توانا سه‌ربازییه‌كان. خزمه‌تكردنی هێزه‌كانی پێشمه‌رگه‌ و دابینكردنی ژیانێكی شایسته‌ به‌ ئه‌ركی خۆمان ده‌زانین و له‌داهاتووشدا گۆڕانكارییه‌كان ده‌بینن. له‌و چوارچێوه‌یه‌شدا وه‌رگرتنی ئابوونه‌ی حیزبی له‌ناو هێزه‌كانی پێشمه‌رگه‌ قه‌ده‌غه‌كرا، بافڵ تاڵه‌بانی وتی ده‌بێت هه‌مووان خزمه‌تی پێشمه‌رگه‌ قاره‌مانه‌كانمان بكه‌ین و له‌ ئاست رۆڵ و قوربانیدانیان بین.

له‌درێژه‌ی كۆبوونه‌وه‌كه‌دا بافڵ تاڵه‌بانی باسی له‌ هه‌وڵه‌كانی رێكخستنه‌وه‌ی هێزی پێشمه‌رگه‌ی كوردستان كرد و رایگه‌یاند، یه‌كێتی په‌رۆشی دروستكردنی هێزێكی نیشتمانییه‌ كه‌ به‌رگری له‌ خاكی كوردستان و به‌رژه‌وه‌ندییه‌ باڵاكانی بكات. به‌پشتیوانی هاوپه‌یمانان و دۆسته‌كانمان ئه‌م پرۆسه‌ نیشتمانییه‌ جێبه‌جێ ده‌كه‌ین و هێزی پێشمه‌رگه‌ ده‌كه‌ینه‌ هێزێكی پڕچه‌ك و پۆڵایین به‌شێوه‌یه‌ك له‌ئاست ته‌حه‌ددییه‌كان بێت و پارێزه‌ری سه‌قامگیری و ئاسایشی هه‌رێمی كوردستان بێت.

ھه‌ر له‌كۆبوونه‌وه‌كه‌دا ھاوسه‌رۆك سه‌باره‌ت به‌چاكسازییه‌كان و رووبه‌ڕووبوونه‌وه‌ی یاساشكێنان رایگه‌یاند، ده‌بێت ھێزی پێشمه‌رگه‌ وه‌ك ھه‌میشه‌ سه‌رمه‌شقی گۆڕانكاری بن و پارێزه‌ری جێبه‌جێكردنی بڕیاره‌كانی دادگا بن. له‌مه‌ودوا رێگه‌نادرێت هیچ كه‌سێك به‌ناوی پیرۆزی پێشمه‌رگه‌وه‌ ده‌ستدرێژی بكاته‌ سه‌ر موڵكی گشتی و یاساشكێنی بكات. ھه‌ركه‌سێكیش له‌ هه‌ر پله‌ و به‌رپرسیارێتییه‌كدا بێت به‌توندترین شێوه‌ رووبه‌ڕووی ده‌بینه‌وه‌ و راپێچی به‌رده‌م دادگای ده‌كه‌ین. كه‌دڵنیام ھێزی پیرۆزی پێشمه‌رگه‌ وه‌ك ھه‌میشه‌ پشتیوانی سه‌رخستنی ئه‌م پرۆسه‌ نیشتمانییه‌ ده‌بێت.
PUKmedia