یەکێتی حزبێکە لاواز ناکرێت

هاوژین عەبدولواحید

یه‌كێتی هێزه‌و به‌هێزیش ده‌مێنێته‌وه‌، چونكه‌ له‌ بنه‌ڕ‌ه‌ته‌وه‌ هێزێكی به‌هێزه‌و له‌رابردودا سه‌لماندویه‌تی سه‌ره‌ڕ‌ای هه‌موو ئاسته‌نگ و كێشه‌كان، سه‌رباری كوده‌تاو پیلانگێڕ‌ییه‌كان نه‌توانراوه‌ لاواز بكرێت و پایه‌ و كۆڵه‌كه‌ سه‌ره‌كیه‌كانی مانه‌وه‌ی لاواز بكرێت، چونكه‌ ئه‌وه‌ یه‌كێتییه‌ ته‌نها حزبی رابردوو نه‌بووه‌و به‌ڵكو وه‌ك دیارده‌یه‌كی هه‌میشه‌یی بۆ هه‌موو سه‌رده‌مه‌كان هه‌بووه‌و ماوه‌ته‌وه‌.

راستیه‌كه‌ی ئه‌و یه‌كێتییه‌ی به‌خه‌باتی تێكۆشه‌ران و سه‌ختی و ئازاری رۆژگار دروستبووه‌، ئێمه‌ی گه‌یاندووه‌ به‌ سه‌رده‌مێك كه‌ ئیدی هیچ هێزێك نه‌توانێت لاوازی بكات، سروشتی حزبی سه‌ركه‌وتووش هه‌ر به‌وه‌ پێوانه‌ ده‌كرێت كه‌ هێزی خۆڕ‌اگری و مانه‌وه‌ی هه‌بێت له‌ وێستگه‌ و قۆناغه‌ سه‌خته‌كاندا بتوانێت ئاڵنگارییه‌كان بگۆڕ‌ێت بۆ ده‌رفه‌ت و هێزی مانه‌وه‌ به‌خۆی بدات، به‌تایبه‌ت كه‌ له‌ رۆژگاری ئێستا به‌بوونی سه‌رۆكێكی به‌هێزی وه‌ك سه‌رۆك بافڵ جه‌لال تاڵه‌بانی چانسی به‌هێزتر بوون و گه‌یشتن به‌ لوتكه‌ بۆ یه‌كێتی له‌هه‌موو كات له‌بارتره‌.

یه‌كێتی تۆكمه‌ و به‌هێز و خاوه‌ن بڕ‌یاره‌، یه‌ك ده‌نگه‌ یه‌ك ره‌نگه‌و یه‌ك ئاڕاسته‌یه‌ و یه‌ك باڵ و یه‌ك ماڵه‌، له‌ هیچ بڕ‌یارێك ناترسێت كه‌ له‌به‌رژه‌وه‌ندی خه‌ڵكی كوردستاندا بێت و حزبێكی نه‌ته‌وه‌یی و نیشتمانییه‌ سنووره‌كانی تێپه‌ڕ‌اندووه‌و ته‌نانه‌ت خه‌ڵكانێكی ده‌ره‌وه‌ی یه‌كێتیش ئومێدی پێیه‌تی، چونكه‌ تاكه‌ حزبه‌ به‌راسته‌وخۆو راسته‌قینه‌ نوێنه‌رایه‌تی ته‌واوی كۆمه‌ڵانی خه‌ڵكی كوردستان بكات به‌هه‌موو چین و توێژه‌كانییه‌وه‌ له‌پێشمه‌رگه‌ قاره‌مانه‌كانه‌وه‌ تاده‌گات به‌كه‌سوكاری شه‌هیدان و  كه‌مئه‌ندامانی سه‌نگه‌ر،  فه‌رمانبه‌ران  و مامۆستایان ... هتد.
بۆ یه‌كێتی لاواز ناكرێت؟ 
پیلانی نه‌یاران به‌رده‌وام له‌دژی یه‌كێتی بووه‌و خه‌می گه‌وره‌یان لاوازكردنی بووه‌، به‌ڵام هه‌رگیز نه‌بووه‌ به‌مایه‌ی لاوازی و روخان و شكست پێهێنانی، چونكه‌ به‌رده‌وام له‌سه‌ر پێیه‌كانی خۆی وه‌ستاوه‌، مام جه‌لالیش هه‌میشه‌ ده‌یگوت: (سه‌فین له‌بن دێت یه‌كێتی له‌بن نایه‌ت)، یه‌كێتی توانیویه‌تی گۆڕ‌انگاری جه‌وهه‌ری بكات و رووبه‌ڕ‌ووی سه‌دان و هه‌زاران سه‌ختی ببێته‌وه‌و پێگه‌ و سه‌نگی خۆی بپارێزێت.

ئه‌وه‌ش ئازایه‌تی ئه‌ندامان و لایه‌نگرانیه‌تی، چونكه‌ یه‌كێتی هی خه‌ڵكه‌و ره‌نگی له‌ناو جه‌ماوه‌ردا داكوتییوه‌، بۆیه‌ پێویسته‌ هه‌موومان ده‌نگ به‌لیستی 222 و كاندیده‌ به‌تواناكانی بده‌ین بۆ ئه‌وه‌ی یه‌كێتی به‌هێزتر بێت و له‌به‌غداد خه‌بات بۆ مافه‌كانی خه‌ڵكی كوردستان بكات، چونكه‌ به‌غداد قووڵایی ستراتیجیمانه‌ و پێویسته‌ چاوی خه‌باتمان له‌به‌غداد بێت.


PUKMEDIA