گورگ و سیخورمەکەی سەمیر

عیماد ئەحمەد

ماوەیەکە دەستم داوەتە نووسینی هەمەجۆر و یادەوەریی، بە شێوازێکی جیاواز و ستایلێکی تازەی تایبەت بە خۆم.

من لە نووسیندا، سیاسەت و ئەدەب و مێژوو، بە زمانێکی کوردی سادە و ئاسان  بەیەکەوە شەتەک دەدەم، زیاتر باسی لایەنی جوانی و خاڵە ئەرێنییەکان دەکەم، نەک لایەنی خراپ و نەرێنییەکان، ئەویش لەسەر بنچینەی گەشبینی بۆ ژیان و ئایندەی خەبات. 

نووسین بە زمانی کوردی بۆ من نوێیە، چونکە  نووسینم لە سەردەمی لاوێتییەوە هەر بە زمانی عەرەبی بووە. بەراستی لە رێزمان و خاڵبەندی و نووسینی کوردییدا، سوودمەندبووم لە چەند هاوڕێیەکی ئازیز و دڵسۆز، تا مردن چاکەیان وەک تەوقی کۆیلە لە گەردنمدایە، لەسەر فەرمودەی (من علمني حرفا ملكني عبدا).

بەهاری ساڵی 1984 لە گەرمیان،  لە دێی حەسەن مەحە بووین، لەگەڵ تیمێکی کادری دڵسۆز و بە توانای خانەقینی، لەناو شۆڕشی نوێی گەلەکەماندا، خەریکی دروستکردنی کەرتی رێکخستنی خانەقین بووین، لەسەر راسپاردەی رەوانشاد کاک نەوشیروان و بڕیاری دەزگای رێکخستنی کۆمەڵەی رەنجدەرانی کوردستان، رۆژانە سەردانی یەک دوو دێی گەرمیانمان  دەکرد، کۆبوونەوەی فراوانمان لەگەڵ خەڵکەکە لەناو مزگەوت، یان لە دەرەوەی مزگەوتدا دەکرد.

لەو سەردەمەدا، گفتوگۆی نێوان یەکێتیی نیشتمانیی کوردستان و میریی هەبوو، منیش لەو کۆبوونەوانەدا قسەم بۆ دەکردن دەربارەی بارودۆخی سیاسی و دوا ئەنجامی گفتۆگۆکە و بەردەوام نموونەی ئەوەم دەهێنایەوە کە مەسەلەکەمان لە عیراقدا وەک ئاسکی گەرمیان وایە و لە بەردەم گورگدایە، دەبێت وریابین و ئاگامان لە مافی میللەتەکەمان بێت و متمانەمان بە دوژمن نەبێت.

دوای ماوەیەک، رۆژێک لە چلەی هاوین و گەرمای گەرمیاندا، وەکو بڵێی خۆر باوەشی بە گەرمیاندا کردبێت، بە پیادە و سەرە و مەسافەوە لەگەڵ ژمارەیەک کادر و پێشمەرگە لە دێی حەسەن مەحە-وە کەوتینە رێ  بۆ دێی رۆسەی شامار، کە نزیکەی سێ سەعاتی دەخایاند، لە رێگە پێشمەرگەیەک کە ناوی جەمال بوو، هەر قسەی دەکرد و نەیدەبڕیەوە، محەمەد فەتاح کە قسەخۆش و راشکاو بوو، لە تەنیشتی بوو، وتی: بۆ مشتێک گوڵەبەڕۆژە نادەن بەم برادەرە، بەڵکو خەریکی گوڵەبەڕۆژە خواردن بێت و بێدەنگ بێت؟! دەزانم خوا، دوو چاو و دوو گوێچکە و  یەک زمانی بە مرۆڤ بەخشیوە، بەڵام وا دیارە ئەم برادەرە سێ زمان و یەک چاو و یەک گوێی هەیە! بێ عاجزیی و تووڕەبوون، هەموومان بە قاقای پێکەنینەوە بەردەوام بووین، تا گەیشتینە دێکە. 

بۆ  پشوودان لە سێبەری دیواری خانووە قوڕەکاندا دانیشتین و قومێک ئاومان خواردەوە، ئەنجومەنی دێکە بەسەر ماڵەکانی رۆسەی شاماردا دابەشیان کردین. 

رۆسەی شامار دێیەکی بچووکی چەند ماڵیی بوو لە نزیکی چەمەکە، بە سۆندە ئاویان لە چەمەکەوە بۆ ماڵەکانیان هێنابوو، ئەو رۆژە من و سەمیری برام و دوو پێشمەرگە بۆ ژەمی نانی نیوەڕۆ کەوتینە ماڵێکی دوو ژوور و بەرهەیوانێکەوە، لە بەرهەیوانەکە لەگەڵ خاوەن ماڵەکە دانیشتبووین، دوای سڵاو و بەخێرهاتن و پێش سفرە راخستن و هێنانی ئەوەی خوا قسمەتی کردبوو بۆ میوانی ناوەخت، کە رەزای قورس دەبێت بۆ خانە خوێ، پیاوی ماڵەکە پرسیاری وەزعی سیاسی و دوا ئەنجامی گفتوگۆکەی نێوان یەکێتی و میریی لێکردین، ویستم وەڵامی پرسیارەکەی بدەمەوە، لەپڕ سەمیری برام لە تەنیشتمەوە، بە ئانیشکی سیخورمەیەکی هاویشتە لاکەمەرم و بە چرپەیەکی تەنزئامێزەوە وتی: کاکە مەسەلەی گورگەکەش لە بیر نەکەی؟! منیش ئیحراج بووم و شڵەژام و بە هەزار حاڵ وەڵامی پیاوەکەم دایەوە.

ئای ئەو رۆژگارە چەند بە ئومێد و دەروێش ئاسا خەباتمان دەکرد! دێی رۆسەی شامار، سەر بە باوەنورە، باوەنوریش ناحییەیەکە سەر بە قەزای کەلارە، رۆسەی شامار دەکەوێتە باشووری ئەشکەوتی داری خلە، ئەو ئەشکەوتەی لە گەرمیان و سەرتاسەری کوردستان، بۆتە هیمای بەرخۆدان و غەدر و بێ رەحمی سروشت، بۆتە مەزارگەی مەلا ئەحمەد و  ژمارەیەک لە پێشمەرگە پارتیزانەکانی گەرمیان.

پێشمەرگەی دێرین و هاوشاریم خەلیل مەلا رەشید، بە دەسپێشخەری و لەسەر ئەرک و گیرفانی خۆی، گۆرەپان و دیواربەندێکی بۆ وێنەی حەوت شەهیدەکەی ئەشکەوتی داری خلە دروستکردووە، کە بەڕاستی مایەی سوپاس و دەستخۆشییە و هیوادارم خوا نموونەی زیاد بکات.

PUKMEDIA