Rêveberiya Xweser: Komkujî û binpêkirin ku li hember gelê me hatine kirin bê ceza derbas nabe

PUKMEDIA

Logoya Rêveberiya Xweser

Rêveberiya Xweser a Demokratîk piştrast kir ku desteserkirina taxên Şêx Meqsûd û Eşrefiyê ji aliyê Hikûmeta Demkî ve kiryarek xayîn û sûc e, û zelal kir ku komkujî, binpêkirin û heqaretên li dijî gel û şehîdên me hatine kirin bê ceza namînin.

Rêveberiya Xweser a Bakur û Rojhilatê Sûriyeyê îro derbarê bûyerên li taxên Şêx Meqsûd û Eşrefiyê de daxuyaniyek ji raya giştî re weşand û tê de wiha hat gotin:

Di 6ê Çileya 2026an de, taxên Şêx Meqsûd û Eşrefiyê yên Helebê rastî êrîşeke leşkerî ya berfireh hatin ku ji aliyê komên girêdayî Wezareta Parastinê ya Hikûmeta Demkî ya Sûriyeyê ve, di çarçoveya planeke Tirkiyeyê û bi piştgiriya bêdeng a hêzên navneteweyî û herêmî hate destpêkirin. Ev êrîş zincîreke nûh ji armancgirtina hebûna kurdî nîşan dide ku kurd pêkhateyeke resene li bajarê Helebê, ev kiryarên ku hatine kirin berdewamiya binpêkirin û komkujiyên peravên Sûriyeyê û gelê parêzgeha Suweydayê ye.

Ev êrîş şeş rojan dom kir û di bingeha wê de êrîşeke navneteweyî li ser du taxên niştecihbûnê bû, çekên giran ên cûrbecûr li dijî çekên takekesî yên sivik bikar anîn. Bi hezaran endamên komên çekdar di nav de çeteyên DAIŞê jî, beşdarî êrîşên bi ser karmendên Hêzên Ewlekariya Hundirîn ku hejmara wan tenê bi sedan bû, kirin. Ji her aliyekê ve êrîş dûrî nirxên mirovî û exlaqî û rêgezên şer ên naskirî bû, bi hezaran bi çekên giran li hember bi sedan hêz bi çekên sivîk.

Tevî vê yekê jî, hevalên me yên di Hêzên Ewlekariya Hundirîn de bi berxwedaneke dîrokî û qehremanî li hember vê êrîşê rawestiyan, parastina li her du taxan kirin. Di şeş rojên berxwedan û wêrektiyê de li dijî çekên giran cûrbecûr, destanên herî bilind ên fedakarî û fedakariyê nîşan dan. Ji fermandarên qehreman Ziyad û Azad, ku êrîşên herî dijwar şikandin û bi vînake hişk berxwedan birêve birin, heya hevalên me Hawar, Viyan, Fraşîn, Rojbîn û Denîz, ku kiryarên wan ên fedakariyê asta herî bilind a pabendbûna bi nirx û doza gelê xwe re nîşan dan, fedakariya wan dê her û her di dil û mejiyê gelê me de bimîne.

Rêveberiyê behsa dagirkirina herdu taxan kir û got: "Dagirkirina herdu taxan ji aliyê komên çekdar ên girêdayî Wezareta Parastinê ve serkeftinek nayê binavkirin. Berevajî vê, ew xiyanet û sûcek giran e ku ji hêla desthilatdariyekê ve tê kirin ku navê dewletê li xwe dike û di heman demê de welatiyên xwe dikuje û rûmeta wan bin pê dike. Desthilatek ku dibêje ku Îslamê diparêze, di heman demê de bi cenazeyan dilîze, civakan şermezar dike û sûcên şer ên eşkere li dijî wan dike. Her desthilatdariyek ku li dijî gelê xwe, xwe dispêre dewletek din, bêyî ku piştgiriya navneteweyî hebe, rewatiya xwe winda dike, ji ber ku tenê gel çavkaniya rewatiyê ye. Bikaranîna tank û topên giran li dijî taxên niştecihbûnê qelsî û tirsa vê desthilatdariyê piştrast dike, ne hêza wê û dê xaleke reş li nav dîroka Sûriyeyê bimîne.

Rêveberiyê piştrast kir ku vîna gelê me, ku bi dehsalan li hember dorpêçkirin û bêmafiyê li ber xwe daye, hem di bin desthilatdariya Baesê de û hem jî di dema Hikûmeta Vemkî de, tevî berxwedana bêhempa a ku ji hêla qehreman û lehengên me ve hatî nîşandan, serkeftina rastîn e. Herwiha komkujî, binpêkirin û kêmkirina li dijî gelê me û şehîdên me hatine kirin dê bê siza nemînin û birînên wan dê di wijdanê me de zindî bimînin heya ku berpirsiyar neyên sizakirin.

Rêveberiyê balkişand ku, bi zanebûn û binpêkirinên jidil ên ku di rojên dawî de qewimîne, em bang li rêxistinên navneteweyî, mafên mirovan û mirovî dikin ku berpirsiyariyên xwe bigirin ser xwe û rewşa mirovî û ewlehiyê li taxên Şêx Meqsûd û Eşrefiyê bişopînin. Gelê me rastî êrişên hovane, binpêkirinên rûmeta mirovan, kuştinên bêdawî, sûcên şer, paqijkirina etnîkî û guhertina demografîk tê. Herwiha em daxwaza hebûna hêzeke navneteweyî li herdu taxan dikin da ku pêşî li sûcên din bigirin, ji ber kêmbûna baweriyê bi hêzên ewlehiyê yên dewletê, ku ji hêla kesên xwedî îdeolojiyên tundrew û mîna DAIŞê ve têne birêvebirin.

Di dawiyê de wiha got: Ji ber ku armanca sereke ya vê êrişê guhertina demografîk e, em ji niştecihên xwe yên li herdu taxan dixwazin ku li malên xwe bimînin û em bang li kesên ku ji cih û warên xwe bûne dikin ku vegerin. Di dawiyê de, her çend em bi tevahî ji mezinahiya êşa ku gelê me kişandiye haydar in, em di Rêveberiya Xweser a Bakur û Rojhilatê Sûriyeyê de piştrast dikin ku emê hemî çavkaniyên xwe yên madî û manewî ji bo sivikkirina bandorên vî şerî terxan bikin û emê li her derê û di her rewşekê de li kêleka gelê xwe bin.


PUKMEDIA