تەندروستی:هێرشكردنە سەر نەخۆشخانە و دامەزراوە تەندروستییەكان رابگیرێت

.

وەزارەتی تەندروستی لەسەر هێرشكردنە سەر راگەیەنراوێكی بڵاوكردەوەو رایگەیاند: لەماوەی ئەم هەفتەیەدا بۆ سێیەمین جار هێرشكراوەتە سەر نەخۆشخانە و دامەزراوە تەندروستییەكان، سەرەڕای هەڕەشەو سوكایەتیكردن بەپزیشكان و كارمەندانی تەندروستی، داواش  لە وەزارەتی ناوخۆو دامودەزگاكانی ئەمنی دەكات هەموو هەوڵێكی خۆیان بدەن بۆ پاراستنی گیانی پزیشكان و كارمەندانی تەندروستی.

ڕاگەیاندراوێك لە وەزارەتی تەندروستی حكومەتی هەرێمی كوردستان...

هەروەك هەموو لایەك ئاگادارن ماوەی چەندین مانگە پزیشكان و كارمەندانی تەندروستی و فەرمانبەرانی تەندروستی خۆنەویستانە بەبێ گوێدانە ماندوویی لە بەرامبەر مەترسی ڤایرۆسی كۆرۆنای نوێ لە خزمەتكردن و شەونخوونی بەردەوامن، وەك سەربازی وون چاونەترسانە بوونەتە قەڵغانی پاراستن و چارەسەركردنی هاوڵاتییانی هەرێمی كوردستان بە گشتی و لە ڕووبەڕووبوونەوەی ئەم پەتایە بەتایبەتی. جگەلەوەی لەپاڵ ئەو هەموو خزمەت و ماندووبوونەدا، چەندین حاڵەتی تووشبووی ئەم پەتایەش لە نێویاندا تۆماركراوە.

بەڵام بەداخەوە، لەماوەی ئەم هەفتەیەدا بۆ سێ یەمین جار هێرشكراوەتە سەر نەخۆشخانە و دامەزراوە تەندروستییەكان، سەرەڕای هەڕەشەو سوكایەتیكردن بەپزیشكان و كارمەندانی تەندروستی كە دواترینیان دوێنێ شەو بوو.

لێرەوە بۆ رای گشتی رایدەگەیەنین كە نەخۆشخانەكان و دامەزراوە تەندروستییەكان موڵكی گشتین و شوێنێكی پیرۆزن، چونكە رۆژانە بەهەوڵ و ماندووبوونی پزیشكان و كارمەندانی تەندروستی چەندین كەس دووبارە ژیانیان بۆ دەگەڕێتەوە و دەگەڕێنەوە ناو خێزانەكانیان. 

بۆ ئەم مەبەستە داوا لە وەزارەتی ناوەخۆ و دامودەزگاكانی ئەمنی لە پۆلیس و ئاسایش دەكەین كە هەموو هەوڵێكی خۆیان بدەن بۆ پاراستنی گیانی پزیشكان و كارمەندانی تەندروستی و رێگریكردن لە دووبارەبوونەوەی هەر جۆرە رووداوێكی لەم جۆرەو وەرگرتنی رێكاری یاسایی بەرامبەر ئەو هێرشە ناڕەوایانە كە بەناحەق دەكرێتە سەر پزیشكان و كارمەندان و فەرمانبەرانی نەخۆشخانەو دامەزراوە تەندروستییەكان.

لەكۆتاییدا داوا لە هاووڵاتییان دەكەین كە خۆیان بە دوور بگرن لە هەڵچوون و هەموو كارێكی ناشارستانی و نایاسایی و لەگەڵ ئەوپەڕی سوپاس و دەستخۆشی داوا لە پزیشكان و كارمەندانی تەندروستی دەكەین ئارامی زیاترو رۆحی مرۆڤ دۆستانە بنوێنن و هاووڵاتییان دڵنیادەكەینەوە كە پزیشكان و كارمەندان لە روانگەی هەستكردن بە ئەرك و بەرپرسیاریەتی و فریشتە ئاسا لە خەمخۆری و بەرژەوەندی هاوڵاتیان دان كەئەمەش سەروەتێكی گرنگی نیشتیمانییە لە هەرێمی كوردستان.

وەزارەتی تەندروستی

حكومەتی هەرێمی كوردستان

٢١ حوزەیران ٢٠٢٠