سه‌رۆك كۆمار و سه‌رۆكی هه‌رێم: گرنگه‌ كێشه‌كان چاره‌سه‌ر بكرێن

.

د. به‌رهه‌م ساڵح سه‌رۆك كۆماری عیراق ئه‌مڕۆ شه‌ممه‌ 20-6-2020  له‌ كۆشكی به‌غدا پێشوازیكرد له‌نێچیرڤان بارزانی سه‌رۆكی ھه‌رێمی كوردستان و وه‌فدی یاوه‌ری.

له‌دیداره‌كه‌دا جه‌ختیكرایه‌وه‌ له‌گرنگی  چاره‌سه‌ركردنی سه‌رجه‌م كێشه‌ هه‌ڵپه‌سێردراوه‌كانی نێوان ھه‌ردوو حكومه‌تی فیدراڵ و حكومه‌تی هه‌رێمی كوردستان له‌سه‌ر بنه‌مای ده‌ستوور و بڕگه‌ یاساییه‌كان و پاراستنی مافی سه‌رجه‌م ھاووڵاتیانی عیراق و ھه‌رێمی كوردستان و مووچه‌خۆران بێ جیاوازی، به‌جۆرێك دادپه‌روه‌ری كۆمه‌ڵایه‌تی بھێنێته‌كایه‌وه‌.

له‌به‌شێكی دیكه‌ی دیداره‌كه‌دا گفتوگۆكرا له‌باره‌ی دۆزینه‌وه‌ی چاره‌سه‌ری پێویست بۆ ده‌ربازبوون له‌قه‌یرانی دارایی، ھاوكات باس له‌ ھاریكاری نێوان ھه‌مووان كرا بۆ به‌ره‌نگاربوونه‌وه‌ی ڤایرۆسی كۆرۆنا و رێگری له‌ بڵاوبوونه‌وه‌ی زیاتری په‌تاكه‌، ھه‌روه‌ھا جه‌ختكرایه‌وه‌ له‌گرنگی پشتیوانیكردنی كارمه‌ند و كادرانی ته‌ندروستی و ئه‌منییه‌كان بۆ زامنكردنی سه‌لامه‌تی گشت ھاووڵاتیان.

PUKmedia راگه‌یاندنی سه‌رۆكایه‌تی كۆمار