موئەیەد تەیب: بەپارێزگاكردنی هەڵەبجە هەنگاوێكە لەپڕۆژەكەی سەرۆك تاڵەبانی

وتەبێژی هاوپەیمانی كوردستان لێدوانی چەند پەرلەمانتارێك رەتدەكاتەوە

وتەبێژی فراكسیۆنی هاوپەیمانی كوردستان لە ئەنجومەنی نوێنەرانی عیراق، رایدەگەیەنێت: بە پارێزگا كردنی هەڵەبجە بڕیاری پەرلەمانی كوردستانە بە هەماهەنگی لەگەڵ حكومەتی ناوەند، بۆیە قسەكردن لەلایەن هەندێك پەرلەمانتارەوە لەسەر ئەو بابەتە هیچ كاریگەریەكی نییە.

موئەیەد تەیب وتەبێژی فراكسیۆنی هاوپەیمانی كوردستان لە ئەنجومەنی نوێنەرانی عیراق، بە PUKmedia ی راگەیاند: هەندێك لە لیستی عیراقیەی سپی بە ناوبانگ لەوەی كە بەردەوام هێرش دەكەنە سەر لایەنەكان، بە پارێزگاكردنی هەڵەبجە بڕیارێكە پەرلەمانی كوردستان دەریدەكات بە هەماهەنگی لەكەڵ حكومەتی فیدراڵی، لەبەر ئەوە ئەو بڕیارە هیچ دژایەتیەك نیە بۆ حكومەتی ناوەند یان بۆ دەستور.

وتیشی: ئەو بڕیارە هەنگاوێكە لەو پڕۆژە یاسایەی كە پێشتر سەرۆك مام جەلال سەرۆك كۆماری عیراق پێشكەشی ئەنجومەنی نوێنەرانی كردبوو، هەروەها لە رێككەوتننامەكەی ئەم دواییەی نێوان هەرێم‌و بەغدا كە نێچیرڤان بارزانی‌و نوری مالیكی ئیمزایان كردووە، كە لەو پڕۆژە یاسایەدا ماف دەدات بە دروستكردنی پارێزگای نوێ لە هەموو عیراق.

راشیگەیاند: لەو بڕگەیەدا كە باس لە پێكهێنانی پارێزگای نوێ دەكات، دەتوانێت زۆر لە كێشەكانی عیراق چارەسەر بكات، بۆیە ئێمە گوێ نادەینە لێدوانی هەندێك كەس، حكومەت‌و پەرلەمانی هەرێمی كوردستان كە بڕیارێك دەدەن، ئەو بڕیارە بۆ ئیرادەی خەڵكی كوردستان دەگەڕێتەوە كە چۆن بڕیاری خۆیان بدەن، بۆیە لێدوانی هەندێك پەرلەمانتار نە كاریگەری هەیەو نە گرنگیشە.

جێی ئاماژەیە، عالییە نسێف ئەندامی‌ ئەنجومەنی‌ نوێنەرانی‌ عیراق،  بەئاژانسی ئەخباریەی راگەیاندووە:  "حكومەتی‌ هەرێمی‌ كوردستان بارودۆخی‌ خراپی‌ بەغدا دەقۆزێتەوەو دور نیە ناوچە جێناكۆكەكان هاوشێوەی‌ هەڵەبجە وەك پارێزگایەكی‌ سەر بەهەرێم رابگەیەنێت".

PUKmedia تایبەت