دروستكردنی بەنداوی باوەنور دەچێتە بواری جێبەجێكردنەوە

لەماوەی 5 ساڵدا جێبەجێدەكرێت

ئیدارەی گەرمیان بەشێوەیەكی رەسمیی دروستكردنی بەنداوی باوەنور رادەگەیەنێت، كە بەبودجەی 234 ملیار دینار و لەماوەی 5 ساڵدا جێبەجێدەكرێت.

یونس ئەحمەد جێگری سەرپەرشتیاری ئیدارەی گەرمیان بە PUKmedia ی راگەیاند: پڕۆژەكە لەزووترین كاتدا دەچێتە بواری جێبەجێكردنەوەو بەتەواوبوونی ئەم پڕۆژەیەش، پڕۆژەیەكی تر دەچێتە بواری جێبەجێكردنەوە كە ئەویش بەنداوی بەردەسوورە لە سەرووی قەزای كەلار، كە لەئێستادا دیزان و شیكردنەوەی تەواوی بۆ كراوە و لەلایەن بەڕێوەبەرایەتی كشتوكاڵی گەرمیان و سەرچاوەكانی ئاوەوە سەرپەرشتی دەكرێت.

یونس ئەحمەد ئەوەشی خستەڕوو كە بەنداوی باوەنور درێژییەكەی 880 مەترەو توانای گلدانەوەی 29 ملیۆن مەتر سێجا ئاوی هەیە، بڕی ئەو بودجەیەی بۆی تەرخانكراوە 234 ملیار دینارەوەو ماوەی دروستكردنەكەشی 5 ساڵە، لە تواناشیدایە 33 مێگاوات كارەبا بەرهەمبهێنێت.

جێگری سەرپەرشتیاری ئیدارەی گەرمیان راشیگەیاند: لەڕووی كشتوكاڵ و گەشتوگوزارەوە، بەنداوەكە سوودێكی زۆری هەیەو دەبێتەهۆی بوژاندنەوەی ناوچەكە،  كە دواتر بەشێوەیەكی بەرنامە بۆ داڕێژراو كاری لەسەر دەكرێت.


PUKmedia سامان یاروەیس - گەرمیان