عیماد ئەحمەد بۆ نێچیرڤان بارزانی: خەڵاتی راستەقینەت متمانەیە لە دڵی خەڵکدا

PUKMEDIA

عیماد ئەحمەد و نێچیرڤان بارزانی

لێپرسراوی مەکتەبی ڕاگەیاندن و هۆشیاری یەکێتی، پیرۆزبایی لە نێچیرڤان بارزانی دەکات و دەڵێت: پیرۆزە پیاوی میانڕەوی، متمانە و دووربینی، ئەم خەڵاتە ڕێزلێنانە لە پیاوێک کە ساڵانێکە بە دڵسۆزی، میانڕەوی، ئارامی، دووربینی و توانای دروستکردنی متمانە، لە قۆناغە هەستیارەکانی مێژووی هەرێمی کوردستاندا ڕۆڵێکی دیار و کاریگەری هەبووە.

عیماد ئەحمەد، لێپرسراوی مەكتەبی ڕاگەیاندن و هۆشیاری یەکێتیی نیشتمانیی کوردستان لە پەیامێکی پیرۆزبایدا بۆ سەرۆکی هەرێمی کوردستان رایگەیاند: پیرۆزبایی بۆ کاک نێچیرڤان بارزانی؛ پیاوی میانڕەوی، متمانە و دووربینی، بە بۆنەی بەخشینی یەکێک لە خەڵاتە بەرز و بەڕێزەکانی ئیتالیا بە کاک نێچیرڤان بارزانی، سەرۆکی هەرێمی کوردستان، گەرمترین پیرۆزبایی خۆم پێشکەشی بەڕێزی دەکەم.

وتیشی: ئەم خەڵاتە بۆ من تەنها ڕێزلێنان لە سەرۆکێک نییە، بەڵکو ڕێزلێنانە لە پیاوێک کە ساڵانێکە بە دڵسۆزی، میانڕەوی، ئارامی، دووربینی و توانای دروستکردنی متمانە، لە قۆناغە هەستیارەکانی مێژووی هەرێمی کوردستاندا ڕۆڵێکی دیار و کاریگەری هەبووە.

ئەوەش دەڵێت: کاتێک بیر لەو ڕۆژانە دەکەمەوە کە لە کابینەکانی حکومەتی هەرێمی کوردستاندا پێکەوە کارمان دەکرد، وێنەی پیاوێکم لەبەرچاوە کە لە بڕیارداندا ئازا و متمانەبەخۆ بوو، لە مامەڵەدا میانڕەو و خۆشڕەفتار، لە هاوڕێیەتیدا دۆست و ڕەفیق، و لە خوێندنەوەی ڕووداوەکاندا دووربین و وردبین بوو.

عیماد ئەحمەد ئاماژەی بەوەشداوە: هەندێک پۆست و پلە بە تێپەڕبوونی کات کۆتایی دێن، بەڵام ئەوەی لە یادەوەریی مرۆڤەکاندا دەمێنێتەوە، شێوازی مامەڵە، ڕێزگرتن لە مرۆڤ و توانای پاراستنی دۆستایەتی لە ناو جیاوازییەکاندا دایە. کاک نێچیرڤان لەو کەسانەیە کە دەتوانێت لەگەڵ جیاوازییەکاندا گفتوگۆ بکات و لە ناو قەیراندا، دەرگای هیوا و چارەسەر کراوە بهێڵێتەوە.

لەکۆتایشدا نوسیویەتی: لە دڵەوە پیرۆزبایی لە کاک نێچیرڤان بارزانی دەکەم و هیوادارم ئەم ڕێزلێنانە نێودەوڵەتییە ببێتە هاندەرێکی زیاتر بۆ بەردەوامبوون لە خزمەت بە ئاشتی، پێکەوەژیان، گفتوگۆ و پاراستنی بەرژەوەندییە باڵاکانی هەرێمی کوردستان، پیرۆز بێت، کاک نێچیرڤان؛ هەندێک خەڵات بە سنگەوە هەڵدەواسرێن، بەڵام خەڵاتی ڕاستەقینەی ئەو متمانەیەیە کە مرۆڤ لە دڵی خەڵکدا بەجێی دەهێڵێت.

PUKMEDIA