کەرتی گەشتیاری چین 9% داهاتی ناوخۆی ئەو وڵاتە پێکدەهێنێت

میدیاکان

چیای لاوجون لە چین

حکومەتی چین بەردەوامە لە پەرەپێدانی کەرتی گەشتیاری و لە دواین ئاماریشدا دەرکەوتووە داهاتی گەشتیاری لە 9% کۆی داهاتی ناوخۆی ئەو وڵاتە پێکدەهێنێت و لە پشووەکانی ئەمساڵیشدا 27 ملیار دۆلار داهاتی ئەو کەرتە بووە.

بەپێی دوایین ئامارە رەسمییەکان، لە ماوەی پشووەکانی ئەمساڵدا، 325 ملیۆن گەشت ئەنجامدراوە، کە بە ڕێژەی 3.6% بەراورد بە ساڵی ڕابردوو زیادی کردووە، هەروەها داهاتی گەشتیاریش بریتی بووە لە 27 ملیار دۆلاری ئەمریکی ، کە بەڕێژەی 2.9% گەشەی کردووە.

پەیوەست بە چالاکییە کولتووریی و گەشتیاریی شەوانەکانیش،ئەوا ناوەندە کولتوورییە گشتییەکان ڕۆڵێکی گرنگیان هەبوو لە ڕاکێشانی گەشتیاران، بە شێوەیەک نزیکەی 49هەزار و 400 چالاکیی جۆراوجۆر ڕێکخراون و 88 ملیۆن کەس سەردانیان کردوون.

لە بارەی چالاکی هونەری و داهاتەکەی، ئەوە بەپێی ئامارەکان رەسمییەکان، لە ماوەی ئەمساڵدا زیاتر لە 32 هەزار چالاکی هونەری هەمەجۆر نمایش کراون و داهاتەکەشی بریتی بووە لە 362 ملیۆن دۆلار کە بە ڕێژەی 14.66% زیادی کردووە.

ئەمەش لەکاتێکدایە کەرتی کلتوری بەرێژەی 4.61% و گەشتیاری 4.35% کۆی بەرهەمی ناوخۆیی وڵات پێکدەهێنن، کە بە هەردووکیان دەکاتە نزیکەی 9%.

PUKMEDIA