یونسێف: ئەفغانستان 25 هەزار مامۆستا و کارمەندی ژن لەدەستدەدات

EPA

رێگری لە خوێندنی ژنانی ئەفغانستان دەکرێت

رێکخراوی یونسێف هۆشداریدەدات بەهۆی کۆتوبەندی پرۆسەی خوێندن لەسەر ژنان لە ئەفغانستان، تا ساڵی 2030 ئەو وڵاتە زیاتر لە 25 هەزار مامۆستا و کارمەندی تەندروستی ژن لەدەستدەدات.

رێکخراوی یونسێف لە راپۆرتێکیدا، ئاماژەی بەوەکردووە: بەشداری ژنان لە کەرتە خزمەتگوزارییەکانی ئەفغانستان لە نێوان ساڵانی 2023 بۆ 2025، لە %21 وە بۆ %17.7 دابەزیوە.

راشیگەیاندووە: سنوردارکردنی خوێندنی ژنان و رێگە نەدان بەکارکردنیان، ئەفغانستان ساڵانە 84 ملیۆن دۆلار زیان دەکات.

دەشڵێت: بەهۆی کۆتوبەندی خوێندنەوە لەسەر ژنان، تا ساڵی 2030 ئەو وڵاتە 20 هەزار مامۆستای ژن و پێنج هەزار و 400 کارمەندی تەندروستی لەدەستدەدات، کە ئەم ژمارەیە زیانێکی زۆر لە ژێرخانی خزمەتگوزاری ئەفغانستان دەدات.

 لە کۆتایشدا، کاترین ڕوسیل بەڕێوەبەری جێبەجێکاری یونیسێف، داوا لە دەسەڵاتدارانی ئەفغانستان دەکات، کۆت و بەندی خوێندن لەسەر ژنان هەڵبگرێت و  کۆمەڵگەی نێودەوڵەتیش پشتیوانی لە مافەکانی ژنان لەو وڵاتە بکەن.

PUKMEDIA