وەزارەتی داد، عیراق لە 800 ملیۆن دۆلار قەرەبوو رزگاردەکات

ماڵپەڕی وەزارەتی دادی عیراق

وەزارەتی داد

وەزارەتی دادی عیراق دەستکەوتێکی یاسایی گەورەی نێودەوڵەتی بەدەستهێناوە، دوای ئەوەی توانیویەتی داوایەکی نێودەوڵەتی لە بەرژەوەندی خۆی کۆتایی پێبهێنێت کە لەلایەن کۆمپانیای پەیوەندییەکانی "ئۆرەنج"ـەوە دژی حکومەتی عیراق تۆمارکرابوو.

ئەمڕۆ دووشەممە، وەزارەتی دادی عیراق لە بەیاننامەیەکدا کە کۆپییەکی دەست PUKMEDIA کەوتوە، بەدەستهێنانی دەستکەوتێکی یاسایی ڕاگەیاند کە خۆی لە بردنەوەی داوایەکی نێودەوڵەتیدا دەبینێتەوە کە دژی عیراق تۆمارکرابوو، بەمەش حکومەتی عیراقی لە پێدانی قەرەبووی دارایی بە نزیکەی (800) ملیۆن دۆلاری ئەمریکی رزگارکرد.

وەزارەتەکە راشیگەیاند: ئەم دەستکەوتە بەرهەمی ئەو هەوڵە یاساییە بەردەوامانە بوو کە بەڕێوەبەرایەتی یاسایی لە ڕێگەی بەدواداچوونی مەلەفی داواکە و داکۆکیکردن لە هەڵوێستی عیراق لەبەردەم دەستەی ناوبژیوانی نێودەوڵەتیدا یاویەتی، بەشێوازێک کە بووە هۆی بەهێزکردنی پاراستنی ماڵی گشتی و پاراستنی مافەکانی دەوڵەت و دامەزراوەکانی لە ناوەندە یاساییە نێودەوڵەتییەکاندا.

بەپێی بەیاننامەکە کۆمپانیای ئۆرەنج پابەندکراوە بە پێدانی بڕی (10) ملیۆن دۆلار بە عیراق لەبەرامبەر هەقی پارێزەری کەیسەکە و خەرجییە یاساییەکاندا.

PUKMEDIA