کۆمپانیایەکی حزبی لەهەولێر وەڵامی وەزیری تەندروستی ناداتەوە

نەخۆشخانەی بەرکەوتووانی چەکی کیمیایی

بینای نەخۆشخانەی بەرکەوتووانی چەکی کیمیایی

وەزیری تەندروستی نوسراوی ئاڕاستەی کۆمپانیایەکی حزبی لە هەولێر دەکات، بە مەبەستی چارەسەری ئەو کەموکورتیانەی کە لە نەخۆشخانەی بەرکەوتووانی چەکی کیمیاییدا هەیە، بەڵام کۆمپانیاکە وەڵامی نوسراوەکە لە وادەی خۆیدا ناداتەوە و بەڕێوەبەری تەندروستی هەڵەبجەش دەڵێت: پێویستە کۆمپانیای زاگرۆس بخرێتە لیستی رەشەوە.

د. ئازاد مستەفا بەڕێوەبەری گشتی تەندروستی پارێزگای هەڵەبجە، رایگەیاند: كۆمپانیایەكی حزبی هەولێر وەڵامی نە ئەنجومەنی وەزیران نە وەزیری تەندروستی حكومەت ناداتەوە.

راشیگەیاندووە: پاش پێكهێنانی لیژنەیەكی باڵا لە ئاستی ئەنجومەنی وەزیران و وەزارەتی تەندروستی بۆ كێشەی نەخۆشخانەی بەركەوتوانی چەكی كیمیایی ، كۆنوسمان خستە بەردەم بەرێز وەزیری تەندروستی و ئاراستەی كۆمپانیای زاگرۆس كرا، بەڵام كۆمپانیایەكە ماوەی یاسایی بەسەرچوو، وەڵامیان نەداوەتەوە.

لە کۆتایشدا، د. ئازاد مستەفا بەڕێوەبەری گشتی تەندروستی پارێزگای هەڵەبجە ، داوا دەکات کۆمپانیاکە بخرێتە بلاك لیست و رێكاری یاساییان لە دژ بگیرێتە بەر و ئامێرە دزراوەكان بگەرێننەوە لە یادی 38 ساڵەی كیمیابارانی هەڵەبجە بۆئەوەی ئێمە بەكاریان بهێنین بۆ بەركەوتوان.

 ئەمەش لەکاتێکدایە، بەرکەوتووانی چەکی کیمیایی چەندین کێشەیان هەیە، پێشتر حكومه‌تی هه‌رێمی كوردستان، بریندارانی چه‌كی كیمیایی بۆ چاره‌سه‌ر ده‌برده‌ ده‌ره‌وه‌ی وڵات، بەڵام چەند ساڵە راگیراوە.

PUKMEDIA