رێز لە خەبات و ماندووبونی دوو تێکۆشەرى دێرین گیرا

مەکتەبی سکرتارییەتی سەرۆک مام جەلال

وێنەى یەکێک لە سەردانەکان

مەکتەبی سکرتارییەتی سەرۆک مام جەلال لە دوو سەردانی جیادا لە قەزای سەیدسادق و گوندی تەپی سەفا سەردانی پێشمەرگە و تێکۆشەرانی دێرین هەریەک لە هەڤاڵان ( محەمەد ئەمین حەسەن، بەکر شەریف ئەحمەد ) یان کرد .

لەو سەردانانەدا، مەکتەبی سکرتارییەت لە نزیکەوە لە تەندروستی هەڤاڵان محەمەد ئەمین و بەکر شەریف یان پرسییەوە و هیوای تەندروستی باشتر و سەلامەتیان بۆ خواستن.

مەکتەبی سکرتارییەتی سەرۆک مام جەلال پێزانینیان دەربڕی بۆ خەبات و تێکۆشانی هەڤاڵانی شارەزوور لە شۆڕشی نوێ و خەباتی چەکداریدا کە ئازایانە و مەردانە هەڤاڵانی ئەو دەڤەرە وەک بەشێکی گەورە و کاریگەر پۆل پۆل دەهاتنە ناو ریزەکانی پێشمەرگە و دەبوون بە مەچەکێکی بەهێزتر دژ بە زوڵم  و زۆری دوژمن کە هەریەک لە هەڤاڵان " محەمەد ئەمین و بەکر شەریف" وەک دوو تێکۆشەر و پێشمەرگەی ئازاو ورە پۆڵاین هەر لە تافی گەنجێتیەوە هاتنە مەیدانی کوردایەتی و لە ریزەکانی یەکێتی-دا دەستیان بە خەباتکرد .

لە بەرامبەر ئەو رابردووە پاک و پڕ لە سەروەرییەشدا سڵاوی یەکێتییانەی سەرۆک بافڵ جەلال تاڵەبانی ، هەڤاڵ قوباد تاڵەبانی ـ یان ئاڕاستەکرا و رێز لە خەبات و ماندووبونیان گیرا.

لە بەرامبەردا، هەریەک لە هەڤاڵان محەمەد ئەمین و بەکر شەریف سوپاسی مەکتەبی سکرتارییەتی سەرۆک مام جەلال-یان کرد بۆ بەسەرکردنەوەیان و روونیان کردەوە وەک رابردوو لە سەر رێبازی سەرۆک مام جەلال و خوێنی شەهیدان درێژەپێدەری پرەنسیپ و سیاسەتی سەرکەوتووانەی یەکێتیی نیشتمانیی کوردستان دەبین .

PUKMEDIA