تەمویلی مووچەی مانگی یەک خرایە سەر هەژماری بانکی وەزارەتی دارایی

PUKMEDIA

مووچەی فەرمانبەران

وەزارەتی دارایی فیدڕاڵی  زیاتر لە 931 ملیار دیناری وەک تەمویلی مووچەی مانگی یەکی فەرمانبەران رەوانەی هەرێمی کوردستان کرد و وەزارەتی دارایش رایدەگەیەنێت زیاتر لە 36 ملیار  دینار کەمی ناردووە.

وەزارەتی دارایی و ئابوری هەرێمی کوردستان لە راگەیەندراوێکیدا ئاماژەی بەوەکردووە: دوا نیوەڕۆی سێ شەممە 10ی2ی2026، بڕی 931 ملیار و  257 ملیۆن دینار وەک تەمویلی مووچەی مانگی کانوونی دووەمی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لەلقی هەولێری بانکی ناوەندی عیراق.

وەزارەتی دارایی ئاماژەی بەوەشکردووە: بۆ مووچەی مانگی کانوونی دووەمی ئەمساڵ بڕی 36ملیارو 360  ملیۆن و 864 هەزار دیناری لەکۆی تەمویلی مووچە نەناردووە کە بریتییە لەشایستەی چەند مانگی ڕابردووی زیاتر لە هەشت هەزار خانەنشینی سەربازی و شارستانی کە لەساڵی ڕابردودا خانەنشین کراون و دوای پەسەندکردن و تەواوکردنی دۆسیەکانیان لە مانگی کانوونی دووەم داخڵی لیستی مووچە کراونەتەوە،( واتە ئەو خانەنشینانەی کە لەمانگی یەک داخڵی لیستی مووچە کرابونەوەو پێویست بوو چەند مووچەیەک پێکەوە وەرگرن، لەبەغداوە تەنها یەک مووچەیان بۆ هاتووە کە مووچەی مانگی یەکی ئەمساڵە.

 لە کۆتایشدا، وەزارەتی دارایی و ئابووری هەرێمی کوردستان دووپاتی کردووەتەوە: تیمەکانمان لەسەر هێڵن و لەگەڵ وەزارەتی دارایی عیراق لەپەیوەندی بەردەوامدان بۆ چارەسەرکردنی کێشەکەو خەرجکردنەوەی ئەو شایستانە لە نزیکترین کاتدا.

PUKMEDIA