لەئەمساڵدا مووچەخۆرانی هەرێم هیچ مووچەیەکیان پێنەدراوە

PUKMEDIA

دراوی عیراقی

نزیکەی 45 رۆژە مووچەخۆرانی هەرێم هیچ مووچەیەکیان پێنەدراوە و بایکۆتی دەوامیش لەبەشێک لە خوێندنگە و فەرمانگەکان لەلایەن مامۆستایان و مووچەخۆرانەوە دەستیپێکردووە.

وەزارەتی دارایی حکومەتی هەرێمی کوردستان لە ئەمساڵدا هیچ مووچەیەکی دابەشنەکردووە و مووچەخۆرانی هەرێم لەکۆتایی مانگی 12ی ساڵی رابردوودا مووچەی مانگی 10یان پێدراوە و لەدوای ئەو وادەیە و کە نزیکەی 50 رۆژ دەکات هیچ مووچەیەکیان پێنەدراوە.

لەوبارەیەوە پەیامنێرمان لەسلێمانی رایگەیاند، بەهۆی دواکەوتنی مووچەوە بەشێک لە خوێندنگە و فەرمانگەکانی سلێمانی بایکۆتی دەوامیان راگەیاندووە و دەڵێن: هەتا مووچەی مانگەکانی 1 و 2 وەرنەگرین دەوام دەستپێناکەینەوە.

جگە لەمووچەی دوو مانگی ئەمساڵ مووچەخۆرانی هەرێم مووچەی دوو مانگی کۆتایی ساڵی رابردووشیان پێنەدراوە و لەکۆی 14 مانگی رابردوو تەنها 10 مووچەیان وەرگرتووە بەوهۆیەشەوە بایکۆتی دەوامیان راگەیاندووە.

بەپێی زانیارییەکانی PUKMEDIA دوێنێ 9ی2ی2026 وەزارەتی دارایی عیراق رەزامەندی دەربڕیوە لەسەر خەرجکردنی مووچەی مانگی 1ی مووچەخۆرانی هەرێم، بەڵام وەزارەتی دارایی هەرێم لەڕاگەیەنراوێکدا ئاماژە بەوەدەکات، لەئێستادا سەرجەم رێکارە ئیداریی و ژمێریارییەکان لە فەرمانگەی ژمێریاری وەزارەتی دارایی حکومەتی فیدراڵ تەواوکراون و چاوەڕێی گەیشتنی تەمویلەکەین بۆ ئەوەی لە نزیکترین کاتدا دەست بەدابەشکردنی مووچە بکەین.

هاوکات سەرچاوەیەک لەوەزارەتی دارایی هەرێم بە PUKMEDIA راگەیاند: چاوەڕواندەکرێت ئەمڕۆ وەزارەتی دارایی عیراق تەمویلی مووچەی مانگی 1ی مووچەخۆرانی هەرێم بکات و وەزارەتی دارایی هەرێمیش لیستی مووچە رابگەیەنێت.

ئەمەش لەکاتێکدایە، وەزارەتی دارایی و ئابوری هەرێمی کوردستان، رۆژی 29ی12ی2025، دەستی بەدابەشکردنی مووچەی مانگی 10 کرد و لە ماوەی سێ رۆژدا دابەشکردنەکە کۆتاییهات، بەڵام سەرباری نەدانی دووموچەی ساڵی رابردوو، هێشتا دیار نییە کەی مووچەی مانگی یەک دابەشدەکرێت.

PUKMEDIA