چەکدارانی سوریا دێرحافر بە چڕی بۆردومان دەکەن

روانگەی سوری

هێرشی چەکدارانی سوریا

گرووپە چەکدارەکانى سەر بە دیمەشق بەردەوامن لە هێرشەکانیان و هێزەکانى سوریاى دیموکراتیش رایدەگەیەنێت لە چەند سەعاتی رابردوودا، ئەو چەکدارانە 20 موشەک و درۆنێکى بۆمبرێژکراویان ئاڕاستەى دێرحافر کردووە.

بەپێی راگەیەندراوێکی ناوەندى ڕاگەیاندنى هەسەدە، چەکدارەکانى سەر بەحکومەتی سوریا بەردەوامن لە ئاڵۆزییەکان و تۆپبارانى ناوچەکانى نیشتەجێبوون لە دێرحافر، بە ئامانجى فشارخستنە سەر دانیشتووانەکەى و ناچارکردنیان بە ئاوارەبوون بۆ ناوچەکانى ژێر دەسەڵاتیان.

هەسەدە ئاماژەی بەوەشکردووە:لە سەعاتەکانی ڕابردوودا، چەکدارەکان 20 موشەک و درۆنێکى بۆمبڕێژکراویان ئاڕاستەى شارەکە کردووە و هەڕەشەیەکى ڕاستەوخۆیان لەشەر ژیانى خەڵکى سڤیل دروستکردووە، ئەوەش دووپاتیدەکاتەوە بە ئەنقەست ناوچەکانى نیشتەجێبوون دەکەنە ئامانج.

لە کۆتایشدا، هەسەدە دووپاتیکردووەتەوە، هێزەکانیان بە وردى چاودێریی دۆخى مەیدانیى دەکەن و بەردەوامن لە ئەرک و گرتنەبەرى هەموو ڕێکارێکى پێویست بۆ پاراستنى شارەکە و دانیشتووانەکەى.

ئەمەش لەکاتێکدایە، گروپە چەکدارەکان لە 6ی1ی2026 هێرشیان کردە سەر گەڕەکی شێخ مەقسود و ئەشرەفییە لە حەلەب و دوای بەرگرییەکی بێوێنەی هێزەکانی ئاسایشی ناوخۆ، توانیان بچنە ئەو گەڕەکانەوە، هەروەها لە سێ رۆژی رابردوودا بەردەوام چەکداری زیاتر رەوانەی مەسکەنە و دێرحافر دەکەن و ناوە ناوەش سەنگەرەکانی هێزەکانی سوریای دیموکرات و شوێنە مەدەنی و خزمەتگوزارییەکان بە ئامانج دەگرن.

PUKMEDIA